Xosé Lois Ledo distinguido co V Premio de Honra Dolores Ben
AGAPI (Asociación Galega de Produtoras Independentes) acordou en 2021 crear o Premio de Honra Dolores Ben co obxectivo de manter viva a súa memoria e recoñecer aquelas persoas e institucións que encarnan os valores de compromiso, loita e defensa do ben común que ela representou ao longo da súa vida.
Dolores Ben presidiu a Asociación Galega de Produtoras Independentes (AGAPI) entre os anos 2007 e 2019, deixando unha fonda pegada polo seu exemplo de traballo, integridade e compromiso co sector audiovisual. Muller rexa, loitadora e imprescindíbel no panorama cultural galego e estatal, contribuíu coa súa dedicación e esforzo a construír un horizonte sólido para o futuro do audiovisual galego.
Nesta V edición, a Asociación quere distinguir a traxectoria e o labor de Xosé Lois Ledo Andión, profesional estreitamente vencellado ao audiovisual galego e firme defensor do cinema independente.
Licenciado en Xornalismo e especializado en guión e documental, Xosé Lois Ledo Andión é administrador único da produtora Nós, PCG, S.L. Ao longo da súa carreira desenvolveu unha intensa actividade como produtor, director e director de produción en numerosas obras audiovisuais.Entre os seus traballos máis destacados figuran, como director de produción, os filmes Santa Liberdade, Liste, pronunciado Lister e A cicatriz branca. Foi tamén produtor executivo e director do documental Bestas, seleccionado para participar no Festival de Cine de Málaga no ano 2002.
No ámbito televisivo participou nas series O corpo da alma e Imos de viños, ademais dos documentais Inmigrantes no país da emigración, O país dos mistos e O Garabelo.
No ano 2005, a produtora da que é administrador incorporouse a AGAPI, pasando el a formar parte da directiva presidida por Dolores Ben. Máis adiante, durante a presidencia de Felipe Lage, ocupou a vicepresidencia da asociación ata o ano 2025. Como representante do sector audiovisual galego, participou tamén no Parlamento Europeo, en Estrasburgo, na defensa do cinema independente.
A súa traxectoria profesional abrangue igualmente o ámbito da administración pública, onde exerceu como secretario do Concello de Corcubión, interventor da Escola Galega de Administración Pública e xefe do Servizo de Fiscalización e Contabilidade da Consellería de Presidencia e da Presidencia da Xunta de Galicia.
A entrega do galardón terá lugar o vindeiro 10 de xuño ás 19.00 horas en Cinemar Films, estudio cinematográfico de son fundado por Dolores Ben no ano 2006 e situado no polígono de Novo Milladoiro, moi preto de Santiago de Compostela.
O I Premio de Honra Dolores Ben recaeu na poetisa e xornalista cultural Ana Romaní; o II Premio foi para a xornalista Tareixa Navaza; o III distinguiu a tradutora e asesora lingüística Rosa Moledo; e o IV Premio de Honra Dolores Ben foi concedido á produtora Fernanda del Nido.
