“A illa das mentiras” dirixida por Paula Cons de Agallas Films estreouse esta pasada fin de semana na plataforma Filmin, despois dunha longa travesía no deserto” como afirma a directora. Ademais, a película acaba de ser seleccionada no Festival Internacional de Cine de Shanghái, o primeiro festival que volve abrir as súas portas tras o golpe máis duro da pandemia. Esta selección pillounos totalmente por sorpresa e aínda que non poden asistir físicamente ao festival, afirman que non poden estar máis contentos. A película tiña que terse estreado nas salas o 29 de maio, pero o Covid-19 puxo todo en pausa, e como dí o refrán no hai mal que por ben non veña, e esta cancelación da estrea abriulles a porta a poder ser seleccionados en Shanghái, xa que ao ser un festival de clase A esixe unha premier mundial en exclusiva. Paula Cons afirma “agora mesmo non somos capaces de medir as consecuencias para a película do que supón esta selección, o que si estamos seguros é de que afectará moito ás vendas da película no mercado chino”.

“A illa das mentiras” é unha coprodución entre España e Arxentina, que conta con Nerea Barro, Darío Grandinetti e Aitor Luna como protagonistas. A película narra os misterios que rodean á historia das tres mulleres que rescataron a 48 pasaxeiros do buque Santa Isabel, que naufragou fronte á costa da illa de Sálvora o 2 de xaneiro de 1921. 

A produtora Agallas Films atópase inmersa na montaxe do documental “A Cero.5” dirixido por Gonzalo Suárez. O documental segue a vida dun director de cinema, desde as primeiras gravacións co seu pai ata que tras un grave accidente de coche queda paralítico e empeza a gravar todo o proceso desta nova vida que lle leva a xogar ao baloncesto profesional, “é un proxecto moi ambicioso e cunha cantidade de verdade brutal” afirma Paula. “A Cero.5” conta co apoio de TVE e esperan que o documental teña unha boa acollida o ano que vén ao coincidir coa celebración dos Xogos Paralímpicos de Tokio de 2021, onde o baloncesto é o deporte estrela. 

Ademais, contan con outros dous proxectos entre mans, “Maria Casares, a muller que viviu mil vidas” un documental dirixido por Xavier Villaverde. O filme está baseado no bestseller canadense “My Camiño” de Sue Kenney e é unha coprodución con Canadá e Cataluña.

O segundo proxecto que están a desenvolver ten un deses títulos que só con lelo xa queres saber máis, “Dúas vellas, sete gatos e sete máquinas de coser”. O documental toma como obxecto as bragas das mulleres transexuais para tecer toda a historia e achegarse así ao mundo que rodea ás mulleres trans en Brasil.  

Cando lle preguntamos a Paula sobre as consecuencias da pandemia afirma “o golpe do Covid-19 foi duro para todos, ademais o do teletraballo con nenos foi moi complicado, é moi difícil poder combinar traballo e maternidade nun mesmo espazo”. Con todo, Paula Cons non vé un futuro negro para o audiovisual, “o audiovisual sae de todas, non hai sector con máis cintura e flexibilidade ca este.  Ademais, hai que lembrar que o audiovisual foi fundamental para manter a saúde mental dos españois durante o confinamento. O traballo será o dobre de difícil, pero sacarase adiante coma sempre”.