As Federacións e Asociacións de Produtoras Independentes celebran no marco da 27ª edición do Festival Internacional de Cinema de Ourense (OUFF) o I Encontro Estatal da Plataforma Audiovisual de Produtoras (PAP).
Esta plataforma, que representa o 90% da produción independente española, está formada por preto de 600 empresas repartidas por todo o territorio, agrupadas nas seguintes entidades:
• AECINE: Asociación Estatal de Cinema.
• DIBOOS: Federación de Animación e Efectos Visuais composta por 2 Asociacións.
• MAPA: Federación territorial composta por 10 Asociacións de Produtoras Independentes de diferentes Comunidades Autónomas.
• PIAF: Federación de Asociacións de Produtoras Independentes composta por 6 Asociacións de diferentes Comunidades Autónomas.
• PROA: Federación de Produtoras Audiovisuais de ámbito estatal composta por 7 Asociacións de produtoras.
• PROFILM: Asociación de Produtoras que ofrecen servizos a rodaxes internacionais en España.
Durante tres días, os asistentes a este encontro analizaron os prexuízos da recente aprobación da Lei Xeral de Comunicación Audiovisual esperando que o Goberno retome con urxencia o anunciado diálogo a través da posta en marcha de mesas de traballo. Desde a Plataforma PAP, como lexítimos interlocutores, móstranse dispostos a seguir colaborando con todas as institucións e entidades para abordar os retos futuros que se presenten.
Ante o recente anuncio da dimisión do Presidente de RTVE, José Manuel Pérez Tornero, os produtores manifestan a súa preocupación polo novo escenario de incerteza que se presenta no ente público.
Tamén se anuncia a realización dun encontro de PAP coa prensa en Madrid nas próximas semanas para expoñer as principais liñas de traballo e accións urxentes a levar a cabo. Con esta confluencia refórzase a unión entre todas as Federacións e Asociacións que conforman PAP demostrando que é posible trazar un camiño de traballo común na defensa lexítima da produción independente.
