A ópera prima “A illa das mentiras”, de Paula Cons, foi seleccionada para participar en FICAL, Festival Internacional de Cinema de Almería, que se celebrará entre o 14 e o 21 de novembro. En total, oito títulos (de 83 presentados) competirán no certame nacional Ópera Prima, considerado a antesala dos Goya.

Pola calidade das propostas recibidas, a organización decidiu incluír dous títulos máis que na edición pasada. Catro deles están dirixidos por mulleres, como é o caso de “A illa das mentiras”.

“A illa das mentiras'” estreouse en Filmin o 24 de xullo e foi o título máis visto na plataforma na fin de semana da estrea e un do tres máis vistos no mes de agosto. Máis de 40.000 espectadores viron o filme a través da plataforma.

Posteriormente estreouse en 17 salas de toda Galicia, onde aínda continúa en cartel despois de cinco semanas.

“A illa das mentiras” está producida por Agallas Films e dirixida por Paula Con. Ten como protagonistas a Nerea Barros, Dario Grandinetti, Aitor Luna, Vitoria Teijeiro, Ana Oca e Milo Taboada. A película está inspirada en feitos reais, concretamente no afundimento do buque Santa Isabel fronte ás costas da illa de Sálvora (A Coruña) en 1921.