‘O da miña nai’, ópera prima de Nerea Barros producida por Zeitun Films, remata a súa rodaxe en Galicia
A actriz e directora galega Nerea Barros vén de finalizar en Galicia a rodaxe de O da miña nai, a súa primeira longametraxe como directora que conta co apoio da Xunta de Galicia. O proxecto, producido pola nosa asociada de AGAPI Zeitun Films e Cólera Films, preséntase como un poema fílmico autobiográfico que navega nunha linguaxe híbrida entre a ficción e o documental. A película nace dunha experiencia persoal: tras a morte de seu pai, Nerea regresa a Galicia para escoitar o murmullo da súa terra e ollar para a súa nai, Carmen (de 81 anos), como se fose a primeira vez.
Despois de catro semanas de traballo, o equipo completou o itinerario de gravación que arrancou na parroquia compostelá de San Cristovo do Eixo —terra da familia da protagonista—, continuou pola contorna do río Ulla en Pontevea (Teo) e culminou na comarca do Barbanza, con secuencias gravadas na praia de Castiñeiras, no concello de Ribeira.
Ademais de asumir a dirección e o guión, Nerea Barros comparte protagonismo na pantalla coa actriz Carmen Noya. A paisaxe natural, os obxectos da memoria e o espazo sonoro terán un peso fundamental na obra, contando coa participación de destacados artistas galegos como Mercedes Peón e Abraham Cupeiro na súa banda sonora.
