A vida na Gloria, unha localidade ao pé do Camiño Francés, altérase cando Pati, unha alta executiva en plena crise existencial, decide darlle un cambio radical á súa vida estabecéndose alí. O seu obxectivo é converter a vella casa dos avós nun establecemento hostaleiro destinado aos peregrinos que busquen o equilibrio interior e o crecemento espiritual. Para levar a cabo o seu soño conta con Bertín, o seu mellor amigo que é tamén un estrito chef vegano de fama internacional.
A Gloria de Arriba sempre foi o lugar máxico dos veráns da súa infancia, o sitio no que a natureza e a vida pausada da xente enchían de sentido a existencia. Agora Pati quere recuperar esas sensacións e compartilas con todos os camiñantes que busquen descanso no seu idílico oasis de paz. Pero non vai tardar en descubrir que os cálidos días de verán non duran todo o ano, que o veganismo e, sobre todo, que a convivencia coas xentes sabias e pausadas do rural é máis estresante que a do competitivo mundo dos negocios ao que acaba de renunciar.
O inferno que atopará Pati en A Gloria ten caras e nomes: señoras que o queren saber todo, habituais da taberna que presumen de sabelo todo, un matrimonio interesado e argallador (Paca e Waldo), un vello revirado e supostamente inválido e, por riba de todos, Lolo, un brután que a fai tolear en todos os sentidos, para ben e para mal, para a súa desgraza e felicidade
‘Na Gloria’ é un proxecto orixinal de Xosé Antonio Touriñán, Andrés Mahía e Xosé Castro. A serie, de humor costumista e surrealista, está formada por episodios de 15 minutos de duración e dirixida ó público familiar. É unha aposta para o público de entre 30 e 40 anos que consume ficción na OTT, aínda que conservando parte dos elementos e referencias que fixeron triunfar series cun público máis maior na televisión.
Andrés Mahía dirixe este proxecto realizado por Jairo Iglesias e gravado en escenarios naturais. ’Na Gloria’ está protagonizada por Cristina Castaño, Xosé A. Touriñán, Lucía Veiga, David Perdomo e Dani Rovira. É un formato pensado para o seu consumo á carta e súa estrea virá na canle OTT da Telvisión de Galicia; A Galega. ’Na Gloria’ é unha produción orixinal de Tex45 e Undodez para a Televisión de Galicia