A Deputación de Pontevedra e a Asociación de Mulleres Cineastas e de Medios Audiovisuais (CIMA) celebraron onte, na Sede Afundación, a entrega dos I Premio Mulleres no Foco, nados co obxectivo de poñer en valor o traballo feminino no sector audiovisual.
Margarita Ledo, Sonia Méndez Alonso e Noemí Chantada convertéronse nas primeiras galardoadas entre catorce profesionais nomeadas previamente. A cerimonia, que completou o aforo con máis de 150 persoas en directo e que foi retransmitida por streaming, estivo conducida polas actrices Neves Rodríguez, Mela Casal e Sheyla Fariña, e amenizada coa actuación musical de Guadi Galego.
As galardoadas recibiron de mans de Carmela Silva, presidenta da Deputación, a actriz Uxía Blanco e a produtora Chelo Loureiro, respectivamente, os premios, que foron deseñador por Pilar Alonso. A artista viguesa ideou un vangardista carrete de cinema no que destaca o emprego do metal, metacrilato e o debuxo. A presidenta provincial e Chelo Loureiro, integrante da xunta directiva de CIMA, tamén fixeron entrega ás nomeadas dunha figura de Sargadelos.