A celebración da 38 edición dos Premios Goya recoñeceu con dous galardóns ao talento galego.
A actriz do Porriño Janet Novás foi recoñecida como a mellor actriz revelación polo seu traballo en ‘O corno’, película dirixida por Jaione Camborda e producida por Esnatu Zinema e Miramemira. A película foi a gañadora da Cuncha de Ouro no pasado Festival de Cinema de San Sebastián.
Ademais, ‘To Bird or not to Bird’, filme dirixido por Martín Romero e producido por Abano Producións (Chelo Loureiro), recibiu o Goya á mellor curtametraxe de animación. «Subir por terceiro ano consecutivo a recoller un Goya é incrible. A animación é cinema», dixo Chelo Loureiro, que lembrou aos outros nominados na súa categoría.