‘Decorado’ a nova película de Alberto Vázquez, producida por Abano estréase con éxito no Festival de Sitges
A nova película do laureado director e guionista Alberto Vázquez estreouse o domingo dentro da programación oficial a concurso do Festival de Cinema Fantástico de Sitges. O autor galego, procedente do mundo do cómic, tivo tamén unha destacada carreira no cinema de animación, gañando 4 Goyas da Academia, entre outros galardóns, polas súas producións anteriores (‘Unicorn Wars’, ‘Psiconautas’, ‘Homeless Home’ e a curtametraxe ‘Decorado’).
‘Decorado’ é unha produción de Abano Producións, Uniko, The Glow, María y Arnold AIE e Sardinha Em Lata. A prestixiosa distribuidora Le Pacte encargarase das vendas internacionais do filme. O proxecto conta co respaldo de RTVE, ETB, TVG, Movistar Plus+, ICAA, Agadic, a Deputación de Badajoz, o Goberno Vasco e a Deputación Foral de Bizkaia.
‘Decorado’ é unha fábula dirixida a público adulto, xa que os temas que trata Alberto Vázquez adoitan atopar o recoñecemento nesta área especialmente.
A película chegará aos cinemas de toda España o día 24 de outubro, pero previamente está a ter un gran percorrido por festivais de todo o mundo. Tras estrearse no Fantastic Fest de Austin (Texas), onde gañou a mención especial do xurado, chegou ao BFI de Londres a semana pasada e este domingo 12 estreouse en Sitges, con gran éxito de público e moi boas críticas. Os dous pases no festival colgaron o “non hai entradas” enchendo así a sala do Auditori, a maior sala de Sitges, con 1.500 localidades.
Ao pase asistiu unha parte importante dun equipo que alcanza as 200 persoas.