CREA abre o prazo de inscrición da 13ª edición de CONECTA, a súa xornada de encontro entre creadores/as
CREA (Asociación de Profesionais da Dirección e Realización de Galicia) organiza un ano máis CONECTA, a súa 13ª edición. Co patrocinio de AGADIC e da Fundación SGAE e a colaboración da Asociación Galega de Guionistas.
Este encontro está pensado para poñer en contacto guionistas e profesionais da dirección e obter feedback, consello profesional e/ou atopar eventuais compañeiras/os de viaxe. Está dirixido a un amplo abano de creadores e creadoras, desde profesionais ata estudantes, con proxectos en calquera fase de desenvolvemento.A mecánica consiste nunha serie de reunións un a un onde se explican e se escoitan proxectos, polo que a inscrición pode ser con proxecto ou sen el (podedes explicar ideas ou, pola contra, escoitalas e dar consello).
O evento terá lugar o sábado 8 de novembro de 2025 na Sede da Fundación SGAE, en Santiago de Compostela. O prazo de inscrición remata o luns 3 de novembro ás 23:59 h e debe realizarse a través da web de CREA.
