O pasado 18 de marzo arrincaron as xornadas profesionais ‘A produción independente galega’ na Facultade de Ciencias da Comunicación de Santiago de Compostela, con Nati Juncal de Cósmica e Gael Herrera de Tamboura que falaron das diferenzas de producir para cine e para televisión.
O día 20 foi a quenda da Escola de Imaxe e Son de Vigo (EISV) na que Roi Carballido de Filmika Galaika abordou os retos de Producir en coprodución e Mercedes G. Nieto de M International Communication falou sobre a produción en televisión.
O día 25 as xornadas seguiron na Tic-Escola Imaxe e Son de Lugo coa experiencia de Simone Saibene de Noveolas e Suso López de Gaita Filmes que falaron sobre a súa experiencia como produtores executivos con exemplos concretos dos seus filmes.
A CIFP A Farixa de Ourense acolleu as xornadas o día 26 coas intervencións de Alba Gallego de Kraken Media sobre a importancia do traballo da script e Sara Horta de Índigena Films sobre a narrativa de contar historias desde o local para unha audiencia internacional.
O día 28 as xornadas continuaron o seu percorrido na Facultade de Comunicación de Pontevedra con Alba Gallego para falar da importancia do traballo da script.
Xa en abril será a quenda o día 1 de abril na Facultade de Ciencias da Comunicación da Coruña de Chelo Loureiro de Abano Producións que abordará o tema de producir animación e Felipe Lage Coro que falará sobre a produción de cine.
As xornadas rematarán o día 2 no CIFP Imaxe e Son tamén da Coruña coas intervencións de Alba Prol de Meteórica que falará sobre producir para televisión e Héctor Carré de Sun Lúa que achegará a súa visión da produción e do guión.
As xornadas están financiadas en virtude da colaboración establecida entre o ICAA e a Axencia Galega das Industrias Culturais. Baixo o título de ‘Xornadas Profesionais: A produción independente galega’, teñen como obxectivo achegar aos futuros profesionais do eido audiovisual un contacto directo co sector a través de persoas referentes con diferentes perfís e cargos dentro do mesmo.