‘Ciudad sin sueño’ (Sintagma Films) e ‘Sirat’ (Filmes da Ermida) premiadas nos Feroz 2026
O pasado sábado 24 de xaneiro tivo lugar en Pontevedra a gala dos Premios Feroz 2026, organizada pola crítica cinematográfica estatal. Un evento que celebrou o cine máis destacado da tempada e na que tres dos galardóns foron a parar a produtoras asociadas de AGAPI.
‘Ciudad sin sueño’, dirixida por Guillermo Galoe e producida pola nosa asociada Sintagma Films, fíxose co premio á Mellor Película da categoría Arrebato de Ficción. Tanto o director como a produtora galega Marina García, destacaron o longo pero necesario proceso de realización do filme, que adicaron á todos os habitantes da Cañada Real.
Por outra banda a recentemente nominada aos Oscar ‘Sirat’, da nosa produtora Filmes da Ermida, gañou os Premios Feroz a Mellor Música Orixinal e Mellor Tráiler. O director galego Oliver Laxe recolleu os galardóns e aproveitou o momento para salientar o gran traballo dos artistas e artesáns (“mal chamados técnicos”) que conforman os diversos departamentos da creación cinematográfica e sen os que as películas non existirían.
