As xornadas ‘Produción independente galega na provincia de Pontevedra’, organizadas por AGAPI coa colaboración do Concello de Pontevedra e os Premios Feroz, consolidan o potencial do audiovisual galego
Pontevedra, 15 de outubro de 2025 – A Facultade de Comunicación da Universidade de Vigo acolleu o martes 14 de outubro as xornadas “Produción independente galega na provincia de Pontevedra”, un evento formativo e profesional impulsado pola Asociación Galega de Produtoras Independentes (AGAPI), en colaboración co Concello de Pontevedra e os Premios Feroz.
A xornada arrancou coa intervención institucional da Concelleira de Promoción Económica, Anabel Gulías Torreiro, quen destacou o firme compromiso do goberno municipal co desenvolvemento cultural e creativo da cidade. A Concelleira sinalou que a aposta polos Premios Feroz e por este tipo de actividades paralelas responde a unha estratexia máis ampla de apoio ao sector audiovisual como motor económico, social e identitario. Pola súa banda, Fernando de Luis-Orueta, coordinador dos Premios Feroz, agradeceu a colaboración institucional e subliñou o crecente interese que espertan os proxectos audiovisuais galegos a nivel estatal, valorando estas xornadas como un espazo esencial para a reflexión, a conexión e a proxección profesional.
Baixo o título xeral “Produción independente galega na provincia de Pontevedra”, as xornadas estruturáronse arredor de tres mesas de debate que puxeron o foco nos desafíos, oportunidades e realidades do sector audiovisual na provincia:
10:00 – 11:15 | Produtoras da provincia de Pontevedra e camiño internacional
A primeira mesa reuniu a representantes de tres produtoras da provincia: Diego R. Aballe (Coven Films), Mercedes G. Nieto e Mónica Hidalgo (M International Audiovisual), e Elena G. Román (Matriuska Producións), que asistiu en representación de Dani Froiz.
O debate centrouse en como traballar desde Pontevedra para un mercado global, identificando tanto as oportunidades como os obstáculos. As produtoras coincidiron en que a localización pode ser un activo diferencial. A lingua foi outro dos temas tratados: todas sinalaron que producir en galego xa non é visto como unha barreira, senón como unha oportunidade que achega autenticidade e singularidade aos proxectos. Falouse tamén da importancia de equilibrar a identidade local co atractivo para audiencias internacionais, e da necesidade de establecer alianzas con festivais, plataformas e coprodutoras para dar saída ás obras fóra das fronteiras.
11:30 – 12:30 | As rodaxes na provincia de Pontevedra
Na segunda mesa, titulada “As rodaxes na provincia de Pontevedra”, participaron Silvia Fuentes, da produtora Sétima, e Alfonso Zarauza, de Maruxiña Film Company, ambos con recentes experiencias de rodaxe na provincia.
Silvia Fuentes falou da película “As liñas descontinuas”, dirixida por Anxos Fazáns, quen tamén é socia da produtora. Pola súa banda, Alfonso Zarauza compartiu a súa experiencia coa rodaxe de “Así chegou a noite”, de Ángel Santos. Ambas as películas foron filmadas recentemente en distintas localizacións da provincia e exemplifican o potencial do territorio como espazo de creación.
Durante a conversa, abordáronse os retos da coprodución, habitual no audiovisual galego actual, tanto polo necesario reparto de dereitos como pola coordinación entre empresas. Destacouse a forza narrativa que poden ter as historias enraizadas nun territorio concreto, e valoráronse as vantaxes da provincia de Pontevedra como escenario de rodaxe: desde a variedade de paisaxes ata a disposición das administracións e a colaboración da veciñanza.
Ambos compartiron imaxes exclusivas das rodaxes, ofrecendo ao público un adianto visual dos filmes antes das súas estreas previstas nos próximos meses.
12:30 – 13:30 | Mulleres que contan
A última mesa contou coa participación de Alba Gallego (Kraken Media), Nati Juncal (Cósmica Producións, CIMA Galicia) e Beli Martínez (Filmika Galaika, profesora da UVigo), que compartiron as súas traxectorias persoais e profesionais.
A moderadora destacou que moitas mulleres do sector compaxinan varios roles profesionais e persoais. As participantes explicaron como chegaron ao audiovisual e como se converteron en empresarias, moitas veces empuxadas por unha necesidade de autonomía e pola falta de oportunidades nos espazos tradicionais de produción.
O debate afondou na conciliación como un dos temas pendentes no sector, e en como a multiplicidade de tarefas e responsabilidades recae con máis frecuencia nas mulleres. Falouse tamén do paso á produción e dos obstáculos atopados, incluído o “teito de cristal”, que aínda limita o acceso das mulleres a determinados postos de decisión.
A mesa pechouse cunha rolda sobre os proxectos nos que están actualmente a traballar, subliñando o potencial creativo das novas voces femininas e a importancia de tecer redes de apoio no sector.
As xornadas converteron a Facultade de Comunicación da UVigo nun punto de encontro clave para reflexionar sobre o presente e o futuro da produción independente en Galicia, conectando o tecido profesional co talento emerxente.
Dende AGAPI, o Concello de Pontevedra e os Premios Feroz salientaron a importancia de seguir apoiando este tipo de encontros formativos e sectoriais, que consolidan o papel de Pontevedra como referente no mapa audiovisual estatal.
