AGAPI presenta aos mentores e proxectos seleccionados para a 5ª edición de Agapi Impulsa Copros
AGAPI IMPULSA COPROS, o programa de asesoría personalizada de proxectos da Asociación de Produtoras Independentes, xa ten os 5 proxectos seleccionados desta 5ª edición. Marina García (Sintagma Films), Álvaro P. Becerra (Undodez), Beli Martínez (Filmika Galaika), Raúl García (Meteórica Cine) e Rubén Coca (Artyc Content) serán os mentores nesta ocasión.
Un ano máis, a recepción de candidaturas de participación foi elevada, cunha numerosa cantidade de propostas de todas as tipoloxías. Tras a reunión do comité de selección, conformado por Laura Pazienza (H501 Studio), Diego R. Aballe (Coven Films) e Álvaro Liste (Serea Films), e unha difícil deliberación, obtívose como resultado a seguinte listaxe de proxectos:
· ‘Emigrasón’ | Ash Díz | Longametraxe documental
· ‘Epidemia invisible’ | Román Varela | Serie documental
· ‘Fenda’ | Helena Montenegro | Longametraxe documental
· ‘Algún día botareite en falta’ | Manu Sacoga | Longametraxe documental
· ‘Murmurios do noroeste’ | Tatiana Santiago e Victoria San José | Serie de animación
A axenda de mentorías comenzará no mes de setembro, chegando a unhas seis reunións (cada 15 días) nas que mentores e creadores abordarán temas como guión e orzamento, plan de financiamento e de rodaxe, ou preparación de dossier e videopitching.
Cunha traxectoria xa consolidada, Agapi Impulsa Copros reafírmase como unha incubadora clave para o talento emerxente e a creación de novas narrativas desde Galicia. A través deste acompañamento personalizado, AGAPI mantén o seu compromiso co impulso do tecido industrial galego, dotando aos autores e autoras das ferramentas estratéxicas necesarias para converter as súas ideas en producións viables e competitivas a nivel nacional e internacional. Contando nesta edición co apoio de Egeda a través de PIAF.