Nestas 18 edicións, o Festival de Sevilla foi a xanela ás voces máis arriscadas e renovadoras do cinema español. Este ano, a barcelonesa Liliana Torres presentará a súa película, ‘Que hicimos mal?’, producida por Matriuska Producións antes de que o filme viaxe á capital de Estonia para a súa premiere internacional no prestixioso Tallinn Black Nights Film Festival ( PÖFF), un dos certames máis relevantes do norte de Europa.
En ‘Que hicimos mal?’, Liliana Torres, cuxa estrea internacional en Tallín será o próximo 19 de novembro, ademais de dirixir e escribir a película, é tamén a protagonista, dando vida a unha versión distorsionada de si mesma. Ela é unha directora de cinema en plena crise de parella que decide visitar aos seus antigos noivos, dispersados en distintas cidades, para atopar respostas a certo baleiro interior e á pregunta que dá título á película. Con sentido do humor, ‘Que hicimos mal?’ reflexiona sobre as relacións sentimentais nestes tempos tan emocionalmente convulsos e sobre a procura dunha utópica felicidade. Este é a terceira longametraxe de Torres tras ‘Family Tour’ (2013), coa que gañou o Premio Especial do Xurado no Atlàntida Mallorca Film Fest, e o documental ‘Hayati’ (2018).