A historia de “ Nós, produtora cinematográfica galega”, remóntase ao ano 1975, momento no que un grupo de mozos únense para impulsar desde Galicia diferentes eventos relacionados co mundo do cinema e producir películas como “A Esmorga” ou “Retorno a Tagen Ata” de Eloy Lozano Coello. Pero coa morte duns dos fundadores principais, Carlos Varela, a produtora perde forza ata interromper a súa actividade en 1980. Vinte anos despois e coas mesmas ganas que nos seus inicios nace no ano 2000, Nós, Produtora Galega Audiovisual.

Falamos con Xosé Lois Ledo, un dos fundadores orixinais da produtora que aínda hoxe segue á fronte da mesma. Para Ledo, o propósito dos proxectos de Nós segue sendo o mesmo, contar as historias propias de Galicia e dar voz ao pobo galego “pertencemos a unha nación e a “ galeguidade” está por encima de todo, por iso sempre escribimos e rodamos en galego todos os nosos proxectos”.

Actualmente Nós conta con 8 socios que teñen relación con diferentes campos do audiovisual e do xornalismo. Traballan con diferentes colaboradores segundo o proxecto e achéganse a diferentes formatos, desde o documental como con “ Bestas” e “Santa Liberdade”, ata series de televisión como “Familia de Oficio”, serie documental para a Televisión de Galicia que xa leva tres tempadas.

Nestes momentos están a traballar noutra serie para a TVG que leva por título “ Desertores do asfalto” e un documental ficcionado, “Nación”, que conta cunha subvención de Agadic e que aborda o empoderamento das mulleres no último século. A falta de terminar a rodaxe en xaneiro do próximo ano, “Nación” verá a luz en probablemente no terceiro trimestre do 2020. Ademais, en Nós traballan tamén como asesores da Fundación Bautista Álvarez para un proxecto sobre a vida de Moncho Reboiras, político nacionalista asasinado pola ditadura franquista.

Con tantos anos traballando dentro do audiovisual galego, preguntámoslle a Xosé Lois Ledo sobre a saúde do sector na o actualidade, “estamos un pouco peor que fai dez anos, en número de producións galegas a nivel estatal caeu, as causas son diversas”.

«Nós, produtora cinematográfica galega», leva máis de 20 anos traballando polo audiovisual galego e Ledo afirma que o seguirán facendo, “somos como as follas dunha serra, con momentos altos e baixos pero sempre coa forza para sacar os proxectos adiante”.