| O prazo de inscrición para os proxectos internacionais interesados en participar na plataforma de formación, desenvolvemento e coprodución amplíase ata o 3 de decembro |
| Un amplo grupo de destacados expertos e profesionais do cinema no ámbito internacional, participará na primeira etapa de VENTURA, consistente nun programa de formación profesional destinado aos produtores representantes dos cinco proxectos nacionais, seleccionados de entre as máis de 200 candidaturas recibidas. Esta serie de sesións formativas, que se desenvolverá do 11 ao 15 de decembro, pretende achegar e enriquecer coñecementos en materia de financiamento, coprodución, distribución, márketing, sustentabilidade, deseño de audiencia e outras áreas de interese. O prestixioso panel estará composto por Asia Jarzyna, experta en métodos de produción sostible (O Señor dos Aneis); o produtor arxentino Benjamín Domenech (Zama); a directora da axencia Memento International, Emilie Georges (A clase); o Pro’s Talent Manager do Festival de Róterdan, Facundo Lema; a Asesora de Industria Hayet Benkara; a Directora e Xefa de Estudos da plataforma ACE Producers, Jacobine van der Vloed; a coordinadora de Cinemart, Lara González Lobo; a produtora do Pampero Cine Laura Citarella (Trenque Lauquen); o Xefe de Adquisicións e Desenvolvemento do New Europe Film Sales Marcin Luczaj; o director do Locarno Pro Markus Duffner, e a directora de EURODOC, o laboratorio de formación para directores de cinema documental, Nora Philippe. Os proxectos nacionais seleccionados Os cinco proxectos nacionais seleccionados nesta segunda edición de VENTURA son: Ari, da directora Maider Oleaga; La mala gent, dirixida por Amat Vallmajor e producido por Julieta Juncadella e Silvia Cruz; Querer vivir un grito, dirixido por Diana Toucedo e producido por Alba Sotorra e Andrea Vázquez; Se van sus naves, dirixido por Óscar Vincentelli e producido por Elisa Celda e Todo es cárcel, dirixido por Eloy Enciso e producido por Marina Perales e Fran Ruvira. Tras a primeira etapa de formación profesional cos citados expertos, os cineastas que representan a estes proxectos tomarán parte nunha residencia de escritura intensiva de cinco días de duración a cargo do prestixioso cineasta, guionista e docente arxentino Mariano Llinás (La flor), que terá lugar do 15 ao 19 de xaneiro de 2024, en Finca Remesal, un espazo ideal para o desenvolvemento do traballo creativo. Amplíase o prazo de inscrición para os proxectos internacionais O prazo de inscrición para os proxectos internacionais estendeuse ata o 3 de decembro. Os proxectos que resulten seleccionados participarán xunto aos nacionais na terceira e última etapa de VENTURA, consistente nun foro de coprodución internacional, e que se desenvolverá do 20 ao 21 de xaneiro de 2024. Nesta etapa terá lugar unha serie de encontros con outro selecto grupo de profesionais do ámbito cinematográfico internacional formado por produtores, distribuidores, axentes de vendas e membros de comisións de cinema, así como de representantes de fondos, mercados e festivais, entre outros. Tanto os proxectos nacionais como os internacionais presentarán os seus respectivos proxectos ante un xurado de prestixio internacional e optarán a un premio en metálico de 10.000 €. Así mesmo VENTURA ofrecerá premios en servizos valorados en 50.000 € en áreas de son, efectos visuais, DCP + deliveries e distribución nacional e internacional. |
