O LAV.mov, as xornadas de formación e creación audiovisual organizadas en Vedra pola Asociación Senunpeso, celebra esta fin de semana unha nova edición. Nos días 29, 30 e 31 de outubro, a Estación de Tren de Santa Cruz de Ribadulla acollerá obradoiros de found footage e DIT e postprodución, proxeccións de cinema galego e o concurso de curtas express A Fume de Carozo.
Proxeccións
As proxeccións celebraranse na Nave da Estación de Tren de Santa Cruz de Ribadulla (Vedra). Arrancarán o venres 29 de outubro ás 20:30 h coa longametraxe “Dhogs”, escrita e dirixida por Andrés Goteira e cun elenco encabezado por Melania Cruz, Miguel de Lira, Antonio Durán “Morris”, Carlos Blanco e Iván Marcos. O filme é unha estraña mestura de xéneros chea de tensión, que non deixou indiferente ao público que a gozou en festivais de todo o mundo. O seu director, Andrés Goteira, estará en Vedra para presentala e participar no coloquio posterior.
O sábado 30 de outubro ás 20:30 h proxectarase unha selección das curtas premiadas no Festival de Cans 2021. Poderanse ver “Monte Bravo” de Noelia Muíño (mellor curta de ficción e mellor dirección); “Homeless Home” de Alberto Vázquez (mellor curta de animación e mellor banda sonora), “Deux options” de Gon Caride (mellor guión e mellor interpretación masculina) e “O son da balea” de Daniel Suárez-Rubini (premio do público). A sesión completarase coa peza documental sobre o festival “Cans 2020” de Isaura Docampo. O director do Festival de Cans, Alfonso Pato, será o encargado de presentar e participar no coloquio posterior á sesión.
Concurso A Fume de Carozo
Durante a fin de semana, 9 equipos participarán no concurso A Fume de Carozo. Desde o venres ás 18h ata o domingo ás 17:30 h, disporán de 48 horas para realizar integramente unha curtametraxe de ata 5 minutos de duración a partir dunhas directrices que non coñecerán ata o arranque do concurso. Durante o desenvolvemento do concurso, as persoas participantes contarán coa colaboración dun mentor: o director, guionista e produtor Andrés Goteira.
Ao remate do concurso, o domingo 31 de outubro ás 18:30 h, proxectaranse as curtametraxes participantes,. O xurado que elixirá a curtametraxe gañadora estará formado por Sara Iglesias, directora gañadora da primeira edición do certame; Araceli Gonda, guionista; e Javier Trigales, guionista, xornalista e programador cultural. O premio está dotado con 1.000 € e un galardón realizado por BOH.
Esta será a terceira edición do concurso. Nas anteriores gañaron as pezas “Os Remedios” de Sara Iglesias e “Siro” de Lucía Estévez en 2018 e “O Xeneral” de Carlos Prado en 2019.
Obradoiros de formación audiovisual
Tamén esta fin de semana o LAV.mov acollerá dous obradoiros de formación: “Recolectadores de imaxes: obradoiro de found footage“, impartido por Javier Trigales, e “DITsPOSTo: do sensor á pantalla“, impartido por Fernando Alfonsín. Os obradoiros son de 14 horas de duración, con 15 prazas por obradoiro.
O LAV.mov está organizado pola Asociación Senunpeso, co patrocinio do Concello de Vedra e a colaboración da Asociación Papaventos, a Unitaria, o CGAI e BOH.
Catorce anos formando e creando audiovisual
A deste ano será a terceira edición do LAV.mov, logo da paréntese do ano pasado. Este formato dá continuidade ao Laboratorio Audiovisual de Vedra (LAV), que se celebrou durante dez anos e polo que pasaron máis de 1.500 alumnas e alumnos. Esta nova versión segue sendo fiel ao espírito orixinal de ofrecer a estudantes e persoas afeccionadas a oportunidade de adquirir novos coñecementos no eido audiovisual, ao que agora se engade a promoción da realización de pezas audiovisuais con Vedra como contexto. A filosofía é a de sempre: aproveitando e compartindo os coñecementos, a creatividade e os materiais pódense facer grandes creacións sen necesidade de contar con grandes orzamentos.