Ext.-Cemiterio dos Ingleses (Camariñas)-Día
12 de xaneiro de 2022. Máis de 50 persoas están reunidas na rodaxe de ‘Sica’, un amplo equipo técnico e artístico para filmar a nova película de Miramemira que conta a maiores con un total de 120 extras, entre especialistas e figurantes, na súa maioría actrices e actores non profesionais da Costa da Morte.
Tralo éxito de ‘O que arde’ repiten formula na coprodución, esta vez coa produtora catalá Alba Sotorra. O proxecto ‘Sica’ rodado en versión orixinal en galego está enmarcado na Costa da Morte e nace dos recordos e reconstrucións da directora Carla Subirana. ‘Sica’ é tamén o nome da protagonista desta historia mariñeira de naufraxios e despedidas, que encarna Thais García, unha rapaza escollida nun casting polo que pasaron máis de 500 adolescentes da zona. Buscaban caras novas, persoas orixinais e peculiares para interpretar uns personaxes únicos que viaxan entre o documental e a ficción.
Esta coprodución que conta con un orzamento total de 1.800.000 euros está a piques de rematar unha rodaxe que coincide no tempo coa sexta ola da pandemia. Os estritos protocolos de seguimento con tests de antíxenos, o traballo en grupos burbulla e as mascaras e distancia están permitindo rematar sen incidencias esta rodaxe en celuloide, unha peculiaridade nun cine dominado polo formato dixital.
O impacto local é claro, o director de produción do filme, Aleix Castellón, sinala que pode rondar os 600.000 € en retorno directo, seguindo os cálculos que recollen da inxección económica na zona co alugamento de casas, hoteis e todos os servizos de restauración e avituallamento que supón unha rodaxe destas dimensións.
A rodaxe de ‘Sica’ arrincaba o pasado 6 de decembro aproveitando as semanas do nadal para avanzar ao máximo coas actrices e actores menores de idade, tratando de interferir o mínimo no seguimento do curso lectivo.
Contan con rematar o vindeiro luns o groso do filme pero por diante quedarán unhas semanas pendentes de rodaxe que se retomarán na primavera. Precisan imaxes subacuáticas dunhas algas que alcanzan o seu maior tamaño neses meses polo agardarán pola natureza para dar por pechado o filme. O traballo seguirá en postprodución e montaxe para ver por fin rematada película no vindeiro ano 2023.
A produción conta co apoio do ICEC da Generalitat de Catalunya, do ICAA do Ministerio de Cultura, da Xunta de Galicia a través da Axencia Galega das Industrias Culturais (Agadic), o programa Europa Creativa da Unión Europea e coa participación da Televisión de Galicia.
Seguiremos a pista de ‘Sica’ agardando que a súa estrea se poida facer nun gran festival que permita de novo acadar o cumio ao cinema galego.