Portocabo e Nadcon Films pechan un acordo de desenvolvemento, no marco do MIPTV de Cannes, para a coprodución da serie Weiss & Morais. Nadcon Films (Modus, O Gardián Invisible) é unha produtora alemá, liderada por Peter Nadermann (Saga Millenium), con ampla experiencia en coprodución internacional. Liderada por Alfonso Branco, a galega Portocabo (Hierro) será a encargada de levar a cabo o desenvolvemento deste proxecto de ficción Weiss & Morais, (4×90’), unha serie procedimental ambientada na illa de Gran Canaria.

A serie virará ao redor da historia de dous policías, a alemá Ingrid Weiss e o español Rubén Morais. Ambos se verán obrigados a colaborar por mor dun caso de asasinato que involucra á comunidade alemá que vive nas Illas Canarias. As súas personalidades son opostas, ela é a razón, mentres que el móvese guiado polo seu instinto. Portocabo estivo presente neste mercado internacional con varias producións (Hierro -coprodución entre España e Francia-, Miracle Tunes -coprodución entre Italia e España- e Auga Seca -coprodución entre Galicia e Portugal que actualmente se atopa en preprodución). Ademais, a produtora tamén estivo traballando nos seus próximos proxectos ( Garbo- coprodución entre España, Reino Unido e Francia- e O Camiño – coprodución entre España, Italia e Francia-) e reforzando futuras alianzas para novas producións. Deste xeito, Portocabo segue avanzando con forza na súa estratexia como referente na creación e coprodución de contidos internacionais para televisión.