Tras once exitosos anos como produtor executivo en Voz Audiovisual, Alfonso Blanco decide en 2009 poñer en marcha a súa propia produtora, Portocabo, da que hoxe é director xeral e que conta cun equipo de dez persoas. Falamos con eles sobre a súa traxectoria nestes anos e a súa evolución, que desembocou nunha clara aposta pola coprodución internacional de ficción para poder chegar a un público máis amplo.
Un dos seus éxitos máis recentes é a serie Hierro, que foi coproducida con ARTE France, Atlantique Productions e Movistar +, e que se estreou o pasado mes de xuño nesta canle. Protagonizada por Candela Pena e Darío Grandinetti, a serie de ficción está rodada integramente na illa do Hierro e, tras o rotundo éxito da primeira, xa confirmaron para facer unha segunda tempada.
Agora mesmo atópanse inmersos no desenvolvemento de dúas ficcións: unha para Netflix e outra para Alemaña. Ademais, terminaron de rodar recentemente entre Vigo e Lisboa Auga Seca, unha coprodución con SP-i para TVG e RTP que conta co apoio de Agadic. Auga seca é a segunda serie que Portocabo produce con Portugal tras Vidago Palace, un drama histórico emitido en 2017 por Televisión de Galicia e RTP. Deste xeito, Portocabo segue avanzando con forza na súa estratexia como referente na creación e coprodución de contidos internacionais para televisión.
Entre os proxectos que levaron a cabo desde o seu nacemento atópanse a película Os Fillos do Sol coproducida por TVG e TV3, producida por Portocabo e Diagonal TV; o documental A viaxe de Leslie. E na súa liña teen- kids, The Avatars, unha serie musical coproducida con Italia que foi rodada en Madrid con actores americanos destinada a un público adolescente. E a adaptación da mini serie xaponesa Miracle Tunes, unha coprodución entre España, Italia e Suíza que xa foi emitida e coa que queren achegarse ao público infantil.
Afirman desde a produtora que en Galicia hai un bo tecido industrial dentro do sector audiovisual grazas ao apoio das institucións públicas, TVG e Agadic – Xunta de Galicia. Pero quizais, “a clave está en que as producións galegas saben moverse dentro do mercado internacional e isto é fundamental para o crecemento do sector”.