“Pipo”, a nova serie de animación producida pola nosa asociada UNDODEZ, chega ao Xabarín
Pipo, a nova serie de animación da nosa produtora asociada 𝗨𝗡𝗗𝗢𝗗𝗘𝗭, chega ao Xabarín de CRTVG para alegrar aos máis pequenos/as da casa. Creada en Galicia e en galego por Álvaro Mahía e Laura Mahía, responsables da marabillosa serie musical, “Bibopalula”.
Pipo ven de estrearse no festival Castelo Conta de Culleredo e se atopa xa dispoñible na plataforma xabarin.gal. Unha proposta pensada para nenas e nenos de entre 5 e 8 anos que consta de 10 capítulos na súa primeira temporada.
‘Pipo’ conta a historia de Berta, unha rapaza de seis anos que vive coa súa nai e co seu irmán pequeno, un cativo de ano e medio que aínda non anda nin fala e ao que chama sempre Mocos. O primeiro día do novo curso escolar, Berta descobre no patio traseiro a Pipo, un extraterrestre que caeu do ceo. Pipo intégrase na familia e vai descubrindo con sorpresa e curiosidade todos os hábitos dos humanos: desde lavar os dentes E ata pelar as laranxas. A vida de Berta convértese así no escenario dunha aventura permanente.
