Os proxectos de longametraxe ‘Adarna’ (Matriuska Produccións) e ‘Handen’ (Sétima) seleccionados no programa de desenvolvemento de guións Mediterranean Film Institute Script 2 Film
O programa de desenvolvemento de guións Mediterranean Film Institute Script 2 Film vén de anunciar os proxectos seleccionados para 2026, entre os que se atopan dúas producións de asociadas de AGAPI: ‘Adarna’, do director galego Lois Patiño e con produción de Matriuska Produccións; e ‘Handen’ do director galego Ángel Filgueira e con produción de Sétima.
MFI Script 2 Film é un programa internacional de desenvolvemento de guións dedicado a apoiar proxectos ambiciosos e baseados en guións cunha visión narrativa clara, fomentando un diálogo creativo sostido entre escritores, produtores e titores. Esta edición está dirixida a guionistas e produtores que traballan en proxectos en fase de tratamento, primeiro borrador ou borrador avanzado que desexen seguir desenvolvendo o seu traballo dentro dun marco de desenvolvemento de guións estruturado e colaborativo.
As seccións de laboratorio divídense en grupos de traballo coordinadas por grandes profesionais do sector:
‘Adarna’ o proxecto de Lois Patiño con guión xunto a Santiago Fillol, será mentorizado por Nicos Panayotopoulos. Guionista grego galardoado internacionalmente e autor de longametraxes, relatos e novelas traducidos a varias linguas. É consultor de guións, educador e profesor adxunto de guión na Universidade Aberta Helénica.
Por outra banda ‘Handen’ proxecto escrito e dirixido por Ángel Filgueira, pertence ao grupo de mentoría de Ana Sanz-Magallón. Consultora de guións española, conferenciante e autora con 25 anos de experiencia no desenvolvemento de historias e edición de guións en Europa e América Latina, colaborando con programas e institucións de formación internacionais.
MFI Script 2 Film terá lugar en liña, baseándose firmemente nos principios básicos do programa: traballo de guión en profundidade, intercambio crítico e estreita colaboración con profesionais audiovisuais experimentados.