Dúas películas galegas, ‘Arima’ e ‘A illa das mentiras’, foron seleccionadas para participar na 68 edición do Festival de San Sebastián na sección ‘Made in Spain’, onde se recolle unha panorámica do cinema español do ano e inclúe longametraxes que, tanto triunfaron en salas de cine como producións do circuíto alternativo, óperas primas ou filmes destacados noutros certames. Respectivas óperas primas de Jaione Camborda e Paula Cons participarán no certame donostiarra xunto outras seis producións. A maiores, a cinta de Camborda será tamén unha das propostas da sexta edición de Ikusmira Berriak.

‘Arima’, da cineasta donostiarra, residente en Galicia, Jaione Camborda, obtivo o Premio á Mellor Dirección na sección ‘Las Nuevas Olas’ da 16ª edición do Festival de Cine Europeo de Sevilla e o Premio Escáner no 9º Festival Márgenes. Rodada en formato 16 mm. como aposta persoal da directora, esta historia de catro mulleres e unha nena cuxa vida se ve alterada pola chegada inesperada de dous forasteiros, é unha produción de Esnatu Zinema. As actrices Melania Cruz e a nena debutante Nagore Arias lideran o elenco deste filme, que se completa coas intérpretes Rosa Puga, Tito Asorey, Iria Parada e Mabel Rivera.

Jaione Camborda foi tamén seleccionada para participar co plan da súa próxima longametraxe no programa de desenvolvemento de proxectos e residencias Ikusmira Berriak, que organizan o certame de San Sebastián, o Centro Internacional de Cultura Contemporánea Tabakalera e Elías Querejeta Zine Eskola, para implicar novos talentos, produtoras e industrias audiovisuais que apostan pola innovación. Nesta sexta edición elixíronse un total de cinco proxectos procedentes da Arxentina, Chile, España e Reino Unido, entre as 185 propostas recibidas.

Pola súa parte, a directora compostelá Paula Cons reuniu en ‘A illa das mentiras’, nos papeis protagonistas, a Nerea Barros, Darío Grandinetti, Aitor Luna, Victoria Teijeiro e Ana Oca. Inspirada en feitos reais, no afundimento do buque Santa Isabel fronte ás costas da illa de Sálvora en 1921, aborda as consecuencias que o naufraxio ten nun microcosmos tan pechado e peculiar coma o desta pequena illa. Tamén é unha homenaxe ás tres mulleres que salvaron a vida de 48 persoas e que foron inxustamente esquecidas pola historia. O filme está coproducido pola galega Agallas Films, a vasca Historias del Tío Luis, a arxentina Aleph Cine e a portuguesa Take 2000.

Ambas longametraxes galegas participarán na sección ‘Made in Spain’ xunto ás películas ‘La boda de Rosa’ (dirixida por Icíar Bollaín); ‘Las niñas’ (Pilas Palomero); ‘My mexican Bretzel’ (Nuria Giménez); ‘La Mami’ (Laura Herrero) e ‘Padre no hay más que uno’ (Santiago Segura), e a serie ‘Escenario 0’, de HBO Europe.