Daniel Froiz (Matriuska Producciones): “Son optimista por defecto”

Daniel Froiz (Matriuska Producciones): “Son optimista por defecto”

O documental “A Media Voz” da produtora Matriuska acaba de gañar a Biznaga de Prata ao Mellor Director na sección de documentais do Festival de Málaga. Este é o terceiro premio que recibe a cinta dirixida por Heidi Hassan e Patricia Fernández, que vén de gañar no IDFA de Amsterdam e no Festival da Habana como mellor documental. 

Falamos con Daniel Froiz sobre os éxitos de “A Media Voz” e tamén sobre os proxectos nos que están a traballar. Están a piques de terminar a montaxe da nova película de Liliana Fernández “Que fixemos mal?”, a idea é poder estar en festivais a primeiros de ano e poder planear a estrea comercial para a primavera de 2021. A rodaxe da película foi outra das vítimas da pandemia, cando saltou o estado de alarma parte do equipo e da repartición atopábase xa en Méjico para comezar a gravar, víronse obrigados a volver a España no que Daniel Froiz describe como “unha situación bastante dramática, ademais a nivel administrativo parouse todo, había moita incerteza e isto acaba creando un ambiente moi negativo. Ao final conseguimos resolver o resto da rodaxe en Barcelona, pero o impacto económico foi grande”.

Outro dos proxectos que teñen entre mans é “Os días acabados de Míster Stevens” de César Souto, o documental que está a piques de entrar en fase de postproducción foi rodado entre New York e Hartford e esperan poder estrear  o próximo ano. 

Ademais, en Matriuska teñen outros dous proxectos en fase de desenvolvemento, o primeiro deles é a longametraxe de Álvaro Gago “Matria”, a película leva o mesmo título que a curtametraxe gañadora do Goya ao mellor curto de ficción no 2019. Para este proxecto volven contar con Avalon Cinema para a distribución do filme. O segundo, é o documental “Honeymoon” de Kike Otero, aínda en fase de desenvolvemento pero co que contan cunha acordo de distribución con Filmax. 

Preguntámoslle a Daniel Froiz sobre como ve o futuro do audiovisual despois deste parón, “son moi optimista por defecto, creo que estamos nunha situación excepcional, agora toca adaptarse cos novos protocolos. Sabemos que a economía vai sufrir pero sairemos desta como o fixemos outras veces, iso si, tócanos traballar máis e estar máis atentos”.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies