Oito galardóns nos XXIV Premios Mestre Mateo para asociadas de AGAPI, con ‘Sirat’ (Filmes da Ermida) como mellor película
O pasado 21 de marzo tivo lugar na cidade de Lugo a gala dos XXIV Premios Mestre Mateo. Un evento no que as produtoras asociadas de AGAPI recolleron 8 dos galardóns, destacando o Premio a Mellor Película para ‘Sirat’ (Filmes da Ermida). O director, Oliver Laxe, declarou a alegría que lle supuxo rematar o percorrido do filme na súa terra natal, e recoñeceu o traballo das produtoras independentes como imprescindible na súa carreira cinematográfica.
Outro dos momentos máis salientables da noite foi a entrega do Premio de Honra á tradutora e asesora lingüística Rosa Moledo, en recoñecemento á súa traxectoria e contribución ao audiovisual galego. Premiada tamén por AGAPI no 2024 co III Premio de Honra Dolores Ben.
A presidenta da Academia Galega do Audiovisual, Lucía Veiga, fixo un firme chamamento contra a guerra no seu discurso e reivindicando un claro “non ás guerras” desde o sector audiovisual. Veiga subliñou tamén a importancia da unión de todo o sector para fortalecer unha comunidade en constante crecemento e reivindicou o traballo das distintas asociacións profesionais na defensa dos dereitos e da cultura galega.
Palmarés das produtoras asociadas de AGAPI nos XXIV Premios Mestre Mateo:
Mellor Anuncio Publicitario | ‘Ao noroeste do oeste’ – Undodez
Mellor Curtametraxe de Animación | ‘O corpo de cristo’ – Abano Producións
Mellor Documental | ‘360 curvas’ – Rebordelos
Mellor Longametraxe | ‘Sirat’ – Filmes da Ermida
Mellor Serie de TV | ‘Weiss & Morales’ – Portocabo
Mellor Serie Web | ‘Bechos’ ´- Undodez
Mellor Música Orixinal | ‘Sirat’ – Kangding Ray
Mellor Son | ‘Sirat’ – Amanda Villavieja