O documental galego ‘Filmei Paxaros Voando’ amplía o seu voo e estrearase en Filmin
O documental Filmei Paxaros Voando, primeira longametraxe da directora galega Zeltia Outeiriño, chega á plataforma Filmin, onde estará dispoñible para todo o público estatal tras un percorrido de éxito por festivais e salas. A película, gañadora do Premio Mestre Mateo 2024 ao Mellor Documental percorreu certames como L’Alternativa, onde recibiu unha mención especial, o Festival Internacional de Cine de Ourense (OUFF) ou a Semana do Cine de Lugo.
Desde a súa estrea comercial en xaneiro, Filmei Paxaros Voando percorreu salas de toda Galicia e parte do Estado, un camiño que continúa dentro do Ciclo Mestre Mateo. Ademais, proxectouse en espazos de referencia como a Academia de Cine de Madrid, dentro do ciclo “Emergencias”, que exhibe as mellores obras documentais de Galicia e Cataluña. Estes meses de exhibición consolidaron o traballo de Outeiriño como unha das voces máis singulares do novo documental galego.
O salto a Filmin, unha fiestra global para o cinema galego
A chegada de Filmei Paxaros Voando a Filmin supón un novo fito para o cinema galego contemporáneo, ofrecendo a posibilidade de que un público amplo e diverso poida descubrir esta historia íntima e universal. Filmin, plataforma de referencia para o cinema independente e de autor, converteuse nun escaparate fundamental para as novas creadoras galegas e para a proxección internacional do audiovisual feito en Galicia.
Un retrato íntimo sobre a memoria, os coidados e o reencontro familiar
Filmei Paxaros Voandoé undelicado debut no que a cineasta reflexiona sobre o desarraigo, os coidados e a súa historia familiar. Outeiriño, que vive desde fai anos en Barcelona, regresou a Galicia para filmar este proxecto, unha logametraxe documental que toma como punto de partida recuperar a memoria do seu tío, o ourensán Antonio Outeiriño, artesán téxtil. Neste camiño encóntrase coa súa nai Socorro, unha muller moi diferente a ela que mostra a súa faceta máis artística a través da música – Socorro foi directora do coro do Centro Cívico de Coia-. O empeoramento na súa saúde abre un novo camiño de amor e coidados entre elas.
É unha coprodución de Ringo Media e Sétima, un proxecto que a autora comenzou a desenvolver tras o seu paso polo máster de Documental Creativo da Universidad Pompeu Fabra e pasou polas iniciativas L’Alternativa Mentoring (2020), Novos Cinemas Lab (2020), Coming Soon Play Doc (2021), Acció Viver – Dones Visuals (2022), Vilnius Coming Soon (2023), Porto/Post/Doc: Film & Media Festival (2023).
“Filmei paxaros voando” conta co apoio de CRTVG, ICAA, AGADIC, Diputación da Coruña e LABED – Universitat Pompeu Fabra.