O novo filme do director Ignacio Vilar, ‘María Solinha’, comezou a súa rodaxe o luns 19 de agosto en localizacións de Redondela, Cangas e da Illa de Toralla. A rodaxe desta película, que aborda a figura desta muller do século XVII pero trasladada á actualidade, estenderase ao venres 20 de setembro. Así foi anunciado nunha rolda de prensa celebrada na Lonxa de Cesantes (Redondela), na que participaron Ignacio Vilar, director do filme; Grial Montes e Laura Míguez, actrices protagonistas; Rosa Vilas, adxunta ao director xeral da CRTVG; Jacobo Sutil, director da AGADIC, en representación da Xunta de Galicia; Carmela Silva, presidenta da Deputación de Pontevedra; Xosé Manuel Pazos, alcalde de Cangas; Daniel Boullosa, concelleiro de Cultura de Redondela; e Digna Rivas, alcaldesa de Redondela. 

A película está producida por Vía Láctea Films. Conta co apoio da AGADIC (Axencia Galega das Industrias Culturais), da Deputación de Pontevedra, o Concello de Redondela, TVG e o Concello de Cangas.