Balance da I Edición do Agapi Impulsa Copros

Balance da I Edición do Agapi Impulsa Copros

En AGAPI comezan este 2023 facendo balance de “Agapi Impulsa Copros” unha iniciativa lanzada o pasado ano e que este ano volverá celebrarse en abril. Falamos con Uxía Caride, xerente de Agapi e con Manuel Lucas que traballou na organización das mentorías para saber un pouco máis sobre as impresións e aprendizaxes desta primeira edición. Pero empecemos polo principio, como e por que nace “Agapi Impulsa Copros”.

Esta iniciativa nace pensando que é interesante e necesario tender pontes entre as xeracións máis novas e os produtores máis consolidados, para impulsar novos talentos e dar unha oportunidade de crecemento empresarial compartido” (Uxía Caride).

Dos 20 proxectos recibidos, 5 foron os elixidos para  traballar man a man cos cinco produtores e produtoras que formaron parte do Agapi Impulsa Copros na súa primeira edición: Andrea Vázquez (Miramemira), Felipe Lage (Zeitun Films), Luisa Romeo (Frida Films) Gaspar Broullón (OlloVivo) e Ruth Chao (Somadrome). Ao longo de 3 meses os creadores e creadoras e produtores e produtoras traballaron man a man para facer da idea creativa un proxecto viable. 

Entre os proxectos seleccionados hai dúas longametraxes documentais: ‘Primeira Inmersión’ de Cristela Torres e ‘As Movidas’ de Alejandro Gándara, e tres longametraxes de ficción: ‘Furtivo’ de Uxía Diéguez,Dónde están los ladrones?’ de Julu Martínez e ‘Chorima’ de Alicia Úbeda. 

Tanto produtores como creadores insisten que ao final esta mentoría é unha experiencia enriquecedora para todos, así o afirma, por exemplo, Andrea Vázquez de Miramemira:

É unha aprendizaxe en dúas direccións. Os mentores temos a experiencia, e os directores dos proxectos seleccionados teñen o desexo, a mirada e a frescura que nutre o bo cinema”.

Desde o punto de vista dos creadores confirman que quedaron con ganas de máis, pero que definitivamente estas mentorías foi un paso de xigante para baixar as súas ideas a algo real e viable:

Desde a súa ampla experiencia e con realismo, Luisa guioume para entender o camiño e o panorama tan complexo, algo fundamental cando estás a construír a túa primeira película“ (Julu Martínez).

Ademais, Manuel Lucas, responsable de coordinación das mentorías,  asegura que tras tres meses de traballo creouse un vínculo que vai máis aló do proxecto:  “aínda que non deu tempo a empezar coa preprodución, as mentorías foron ese impulso necesario para coller forzas e motivación”.

Para a segunda edición de “Agapi Impulsa Copros”, que arrincará en abril deste 2023, ademais da mentorías incluirase formación máis especializada sobre financiamento para dar un paso máis e facer que estes proxectos cheguen ás pantallas.

En Agapi afirman que “o máis enriquecedor foi a posibilidade de facer crecer proxectos de forma acompañada entre diferentes xeracións” (Uxía Caride).

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies