Andrea Vázquez, Silvia Fuentes e Uxía Caride, candidatas finalistas de AGAPI que optan ao Premio Mulleres no Foco 2025
O vindeiro 17 de outubro terá lugar en Pontevedra a entrega de Premios Mulleres no Foco, promovidos pola Deputación en colaboración con CIMA Asociación de Mulleres Cineastas e de Medios Audiovisuais. Uns galardóns que teñen por obxectivo poñer en valor o traballo das profesionais galegas no audiovisual co fin de mudar as cifras de infrarrepresentación actuais das mulleres do sector.
As finalistas que optan a algún dos tres recoñecementos, dotados con 5.000 euros, son: Beatriz Legerén, Inés Colmero, Irene Basanta,Mabel Rivera, Lucía Estévez, Lucía Veiga, Diana Gonçalvez, Alicia Frances, María Roja, Carmen Méndez, Anxos Fazáns, Ángeles Huerta, Sabela Iglesias e Mayka Brañaque. Así como Andrea Vázquez, Silvia Fuentes e Uxía Caride, candidatas de AGAPI Asociación Galega de Produtoras Independentes.
O acto será conducido por Lucía Veiga e contará coa actuación musical de Guadi Galego, acompañada por Margarida Mariño.
Andrea Vázquez é produtora e realizadora, cofundadora de miramemira e unha figura clave no cinema galego actual. A súa traxectoria de proxección internacional inclúe a produción de títulos aclamados como O que arde (2019) e O corno (2023), esta última gañadora da Cuncha de Ouro en San Sebastián. En 2024, a súa contribución ao sector foi recoñecida co Premio Chano Piñeiro do OUFF.
Silvia Fuentes é unha produtora de cinema con formación en Comunicación Audiovisual e Máster en Produción Executiva. En 2018 cofundou a produtora Sétima, enfocada en películas europeas cunha forte autoría. A súa experiencia inclúe roles cruciais como produtora executiva en filmes como Cando toco un animal e xefa de produción en títulos destacados como O corno e Matria.
Uxía Caride é xerente da Asociación Galega de Produtoras Independentes (AGAPI) desde hai máis de doce anos, dedicándose á representación e defensa dos intereses do sector audiovisual. Compaxina este labor coa docencia na USC e cunha forte implicación na xestión cultural galega. Tamén é membro activo da directiva da Asociación Culturgal e de entidades como a Asociación de Mulleres Cineastas (CIMA).