A serie producida por Portocabo para Movistar Plus +, ‘Rapa’, estrea a súa segunda tempada o 15 de xuño de 2023 na plataforma, dende onde tamén confirmaron unha terceira tempada que dará peche á celebrada ficción televisiva.
Creada por Pepe Coira e Fran Araújo e dirixida por Rafa Montesinos, con Alfonso Blanco (Portocabo) na produción executiva, esta segunda tempada leva a Maite (Mónica López) e a Tomás (Javier Cámara) a Ferrol, onde dous casos sen resolver volverán a unilos. Adentraranse no Arsenal, un mundo hermético rexido por unhas normas moi estritas, onde desapareceu unha oficial. El empeñarase en resolver un caso de asasinato que está a piques de prescribir despois de 20 anos.
O teatro Jofre de Ferrol acolleu o 14 de xuño a premiere da serie, onde tamén proxectaron o primeiro capítulo. A esta presentación acudiu o groso do seu elenco, unha nutrida representación do talento interpretativo galego, con actrices e actores como Melania Cruz, Iolanda Muíños, Lara Boedo, Carlos Blanco, Darío Loureiro, Chisco Amado, Adrián Ríos, Evaristo Calvo, ou Federico Pérez no seu elenco.
