Tres obras de produtoras asociadas de AGAPI recoñecidas na Xuntanza de Finalistas dos Premios Mestre Mateo 2026
O pasado venres 6 de marzo a Academia Galega do Audiovisual organizou a Xuntanza de Finalistas dos Premios Mestre Mateo 2026 no Museo Interactivo da Historia de Lugo. Onde tres obras de produtoras asociadas de AGAPI foron recoñecidas.
O Premio ABANCA ao impulso da sostibilidade á serie ‘Bibopalula‘ (Undodez). «Por integrar de forma coherente, creativa e responsable os valores da sostibilidade tanto na súa proposta narrativa como na súa vocación pedagóxica.».
O Premio Deleite á promoción da lingua foi para a serie web ‘Pipo‘, recoñecendo o seu labor na creación de contidos audiovisuais que achegan o galego ás novas xeracións dun xeito natural, creativo e próximo.
O Premio Martín Códax Rías Baixas, Fillo do Atlántico foi para o filme As liñas descontinuas «pola súa sensibilidade e capacidade para converterse en embaixadora do espírito das Rías Baixas trazando un relato que proxecta unha imaxe auténtica e contemporánea de Galicia, na que a música ocupa un lugar esencial, reforzando o vínculo entre cultura, mocidade e creación».
A gala dos XXIV Premios Mestre Mateo celebrarase o vindeiro 21 de marzo en Lugo, no Auditorio Fuxan os Ventos, e recoñecerá o talento das producións galegas máis salientables do último ano.