Durante o pasado 2020 a produtora Miramemira seguiu pechando cousas do gran éxito de “O que arde”, o último filme de Oliver Laxe. Ademais estivo traballando en varios proxectos, o máis importante de todos eles é “San Simón” unha longametraxe dirixida por Miguel Ángel Delgado. A película tiña que rodarse o pasado outono pero a pandemia obrigoulles a atrasalo, desde a produtora esperan estar a rodar en novembro deste 2021.
O segundo dos proxectos que teñen entre mans é “ Sica” a primeira longametraxe de ficción da directora catalá Carla Subirana. Agora mesmo atópase en fase de produción e a cinta coproducirana coa produtora catalá Alba Sotorra, rodarase a finais do 2021, principios de 2022. A película conta a historia dunha adolescente que vive na Costa da Morte e perde ao seu pai nun naufraxio.
E por último teñen dous proxectos en desenvolvemento, o primeiro deles leva por título “O corno do centeo”, a próxima película da directora Jaione Camborda, neste caso realizan a coprodución coa produtora Esnatu Zinema que dirixe Camborda. A cinta é unha longametraxe de ficción ambientado entre A Illa de Arousa e a fronteira fluvial entre Galicia e Portugal.
O segundo proxecto no que están a traballar é “Así chegou a noite”, a última película de Ángel Santos, aínda en fase de guión.
Á produtora Miramemira a pandemia obrigoulles a pospoñer a rodaxe de “San Simón” e aínda que esperan rodar este ano afirman que o futuro é incerto, así nolo conta Andrea Vázquez: “hai bastante incerteza, agora mesmo non está nada claro, nesta película hai bastante figuración, en proxectos como este meter unha partida para probas PCRs non é viable. Esperamos que as normativas no traballo se resolvan pronto. Hai series e películas que están reformulando guións para evitar o contacto e manter as distancias, pero nós facemos un cinema naturalista e este tipo de solucións non funcionan”. A pesar disto, desde a produtora afirman que este parón obrigatorio permitiulles desenvolver máis e afondar máis nos guións.
Preguntámoslle Andrea sobre o futuro do audiovisual e esta é a reflexión que compartiu connosco: “ao estar máis na casa a xente está a consumir moito máis audiovisual, sobre todo nas plataformas dixitais, só esperamos que se siga financiando como ata o de agora, con axuda pública e con fórmulas como a da taxa das plataformas, que obriga a reverter no capital español, isto permítenos facer producións de máis dificultade como a que facemos nós”.