A cultura que toca: Culturgal 2021 desconfínase do 26 ao 28 de novembro

A cultura que toca: Culturgal 2021 desconfínase do 26 ao 28 de novembro

A Ponte do Burgo, con oitocentos anos de historia en Pontevedra, acolleu a presentación da Culturgal 2021 este martes 13 de xullo pola mañá. Baixo o lema “A cultura que toca” o evento recupera a parte feiral tras a pandemia e desenvolverase do 26 ao 28 de novembro no Pazo da Cultura de Pontevedra. A reserva de espazo feiral está aberto para empresas, entidades e artistas asi como a convocatoria para participar na programación, con prazo até o 15 de setembro. Participaron na presentación o presidente e o director de Culturgal, Víctor López e Xosé Aldea respeitivamente, acompañados da deputada provincial Victoria Alonso, o director da Agadic-Xunta de Galicia, Jacobo Sutil e a concelleira de Cultura de Pontevedra, Carme Fouces.

Precisamente cun cálido agradecemento aos patrocinadores institucionais abriu o acto Víctor López “Marcamos o punto de arranque da 14 ª edición de Culturgal nun espazo ao aire libre, nesta Ponte do Burgo, que dalgún xeito simboliza esa necesidade que todos temos de recuperarnos como seres sociais, de recuperar o disfrute do espazo público, de recuperar o disfrute da cultura. A cultura que toca é o lema que escollimos este ano e que queremos que teña un amplo significado, por unha banda, o relativo a fomentar o contacto entre a acción cultural ao vivo e o público, entre as empresas e axentes culturais, coa previsión de que esta Culturgal será a do reencontro, a da recuperación, a do contacto directo coa cultura. Este leiv motiv de A cultura que toca tamén, porque se sempre é necesaria, pensamos que agora máis que nunca cultura para superar a crise, cultura para fomentar o diálogo, o respecto e a diversidade, cultura como laboratorio dun futuro mellor, cultura como punto de encontro”, reseñou o presidente da Asociación Culturgal.

O director da Feira, Xosé Aldea, convidou ao sector cultural a participar na Feira confeccionando un programa que é “un proxecto colectivo, xa que a programación da Culturgal constrúese con propostas chegadas das empresas, das entidades e institucións, dos creadores e artistas, nun proceso que está aberto até o 15 de setembro”. A dixitalización da Culturgal toma impulso tras unha pasada edición en streaming que serviu de aprendizaxe para a organización que, en 2021, poñerá en marcha a Culturgal TV, unha canle que a xeito de magazine funcionará como “unha tele cultural de fin de semana”. Sinalou que o venres 26 de novembro será unha xornada orientada aos profesionais do sector e os días 27 e 28 abrirase ao público.

Victoria Alonso, deputada de Cultura e Igualdade na Deputación de Pontevedra, destacou a presenza que terá a institución provincial na Feira con stand propio mostrando a cultura feita na provincia. “Sabemos que non poderemos ofrecer a interacción e o dinamismo doutros anos no stand, pero volveremos a traballar con entusiasmo con todos os concellos para mostrar a súa labor cultural”, sinalou. 

Desde a Agadic-Xunta de Galicia, Jacobo Sutil reseñou que Culturgal volva a ser punta de lanza da cultura galega. “Se o ano pasado fixeron unha edición online exemplar, é unha moi boa nova recuperar a presencialidade e o contacto directo do público coa cultura, imprescindible para reactivar o sector entre todos”, apuntou. Sutil destacou a exemplar alianza público-privada que implica Culturgal e anunciou a presenza da Xunta de Galicia con stand propio, como ven sendo habitual na Feira, con especial destaque para as actividades promovidas polo Xacobeo 21-22, “un acontecemento fundamental para empurrar o sector tras esta crise”.

Pechou a presentación de Culturgal a concelleira de Pontevedra Carme Fouces que fixo unha metafora entre a Ponte do Burgo, o lugar da rolda de prensa, e Culturgal. “Por innovación, por historia, por servir de conexión, de ferramenta de comunicación, por ser un relatorio da cultura nos últimos anos”, indicou, para engadir que o concello de Pontevedra “non só poñerá o espazo físico, o Pazo da Cultura, senón a alma nesta Culturgal da recuperación”.

Até o 15 de setembro todas aquelas entidades interesadas en presentar os seus espectáculos, produtos ou servizos na Culturgal están convidadas a facelo a través da web cultur.gal. Teñen prioridade aquelas procedentes de empresas asociadas a Culturgal, é dicir, ás pertencentes a Escena Galega, Agapi, Asociación Galega de Editoras, Eganet e Asociación Galega de Empresas Musicais (AGEM), que tamén gozan de desconto na reserva de stands. 

Malia non estar representado na rolda de prensa, o Ministerio de Cultura e Deporte tamén é un dos patrocinadores da Feira e o presidente de Culturgal, Víctor López, anunciou que o evento foi un dos tres mellores valorados do Estado dentro da convocatoria ministerial 2020 de axudas para a acción e a promoción cultural. Con este motivo, o 11 de novembro a organización está convidada a un acto na Fundación Telefónica de Madrid promovido polo Ministerio de Cultura no que se presentará o proxecto Culturgal ao longo das súas catorce edicións.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies