O próximo mes de abril chegará aos cinemas da man de Filmax a comedia galega ‘Cuñados’, ópera prima de Toño López (‘Mareas Vivas’) e primeira longametraxe tamén da produtora especializada no medio televisivo Portocabo.
‘Cuñados’ é unha comedia de enredo sobre as peripecias delituosas de tres cuñados unidos polo azar e embarcados nun plan disparatado. Trátase dunha produción de Portocabo que conta coa participación de RTVE e Televisión de Galicia e coa subvención da Axencia Galega das Industrias Culturais (Agadic). En ‘Cuñados’ colaboraron tamén a Deputación de Ourense e D.O. Ribeiro e está rodada integramente na provincia de Ourense. Filmax encárgase da distribución en España, así como das vendas internacionais.
A película conta cun elenco integrado por Xosé A. Touriñán, Miguel de Lira, Federico Pérez Rey, Eva Fernánde, Iolanda Muiños e María Vázquez, entre outros. O guion é obra de Araceli Gonda (‘Hierro’; ’18 comidas’). Parte do equipo técnico está integrado por Jaime Pérez na dirección de fotografía; Lu Rodríguez na montaxe; Santi Jul e Iván Laxe na música orixinal e Andrea Pozo na dirección artística, entre outros.