‘Unicorn Wars’, producida por Abano Producións (Chelo Loureiro), vén de gañar o Premio Días De Cinema á mellor película de animación. É unha das nomeadas ao Premio Goya nesta nova edición.
A película de animación ‘Unicorn Wars’, producida por Chelo Loureiro e dirixida por Alberto Vázquez, estreouse en cinemas despois do seu paso polo Festival de Annecy e o Festival de Sitges, entre moitos outros.
Trátase dun potente drama antibelicista, ‘UnicornWars’ é unha reivindicación do cinema de animación tamén para adultos, cunha coidadosa creación artística e un contido que xoga cos xéneros do cinema bélico e o drama, engadindo elementos fantásticos e certo sentido do humor.
O exército osiño adoutrina a novos recrutas para a guerra que libran contra os unicornios e ameaza a seguridade do pobo osiño. Os irmáns Azulín e Gordi, xunto a un inexperto grupo de recrutas, serán enviados a unha perigosa misión para salvar o Bosque Máxico. Estarán os osiños preparados para iso? Unha alegoría que afonda ata a esencial do mal, percorrendo os territorios do enfrontamento ancestral entre homes e mulleres, entre o ben e o mal.