Está claro que este 2020 non llo está poñendo fácil a ninguén, pero na produtora Gaitafilmes souberon sacarlle proveito ao confinamento, sobre todo para darlle unha volta á parte creativa de todos os proxectos que tiñan en marcha.

Na actualidade atópanse na fase final de montaxe de Welcome to Ma Maison, a nova longametraxe documental de Andrés Goteira que esperan estrear o ano que vén. Ademais, están en fase de desenvolvemento de dúas novas longas de Andrés, Monstro e Starmucks, ambas as cintas contan co apoio a desenvolvemento de Agadic. Starmucks é o seu proxecto máis ambicioso ata a data, recibiron varias asesorías de guión e esperan rodar en 2022, en palabras do produtor Suso López “esta longa é un salto importante para nós a nivel de produción”.

Este ano por primeira vez traballan en proxectos dirixidos por realizadores externos á produtora. O primeiro deles é Verbena, dirixido por Rafa dos Arcos e Adrián D.Bóveda “Jarri” (Novedades Carminha), cinta que recibiu a axuda de talento da Xunta de Galicia. Agora mesmo están en fase de preprodución, pero con todas as verbenas canceladas e a incerteza do que pasará o ano que vén, a rodaxe polo momento parece complicada de abordar.

O segundo destes proxectos é un documental dirixido por Lucía Dapena, O silencio herdado, que afondará na memoria histórica a través da voz do avó da realizadora.  Para este proxecto contan con dous socios de Barcelona, A Selva e Mayo Films, e recibiron tamén axuda ao desenvolvemento de Agadic.

E por último traballan en dúas curtametraxes, a primeira delas diríxea Felix Brixel e leva por título Madalenas, acaban de recibir o apoio do ICAA. E a segunda, Todas as casas, é un pequeno proxecto documental que se enmarca dentro do ano Xacobeo e co que queren dar visibilidade ao despoboamento rural de Galicia. Actualmente están na procura de localizacións para mostrar todas esas casas que quedaron baleiras e paradas no tempo.

A pandemia puxo freo ás rodaxes, co impacto económico que iso supón, pero Suso López afirma que desde a produtora trataron de indagar na parte creativa dos proxectos “serviunos para tomar alento e mirar aos proxectos coa cabeza limpa”.