Foron seleccionadas oito empresas do sector en Galicia para 12 proxectos
O ano 2024 foi un ano de moitas e boas novas para a producción galega, tanto en número como en galardóns obtivos a nivel nacional e internacional. Un éxito do que tamén forma parte a Asociación Galega de Produtoras Independentes, Agapi, xa que aglutina a 39 empresas produtoras de cine, televisión, publicidade e servizos, e leva contribuindo activamente á consolidación e desenvolvemento da industria de Galicia dende o ano 1994.
Como broche final ao ano, a última nova da que Agapi se sente orgullosa é de que as Axudas Selectivas convocadas polo “Instituto de la Cinematografía y de las Artes Audiovisuales (ICAA)”, no caso de Galicia, foron parar nun 100% a empresas socias de Agapi.
Trátase das oito produtoras galegas: Mordisco Films, Sétima, Frida Films, Miramemira, Gaitafilmes, Matriuska, Abano e Nós Produtora, que recibiron orzamento para 12 proxectos que están en producción ou a piques de comezar o plan de rodaxe.
Mordisco Fims, é unha produtora con sede en Bóveda, Lugo.
O proxecto seleccionado é ‘La mala madre’, unha coproducción con Admirable Films coa dirección de Alicia Albares, que foi dotado con 570.000 €. “Arrepentíraste de non ter instinto maternal” é o lema sobre o que xira a historia deste proxecto. A historia comenza cando Victoria desperta cun brazo roto nunha casona no medio dun bosque. Unha monxa e un médico encárganse de coidala, pero axiña a presenza dunha muller faralle recordar a realidade da traxedia.
Outro dos proxectos seleccionados, en coproducción coa tamén lucense Gaitafilmes é ‘Monstruo’.
O lucense Alberto Díaz, un dos responsables da produtora, comenta: “Trátase da primeira vez que nos dan esta axuda que supón un importante pulo á producción deste filme que xa conta con numerosas seleccións internacionais”. Como membro de Agapi, destaca a boa estructura da asociación e o contacto continuo con outros produtores.
Sétima é unha produtora que naceu da man de Anxos Fazáns e Silvia Fuentes, con sede en Santiago. O ICAA seleccionou dous proxectos seus:
‘Las líneas discontinuas’, en coproducción con Elamedia, e dirixida por Anxos Fazáns (segunda longametraxe), é un filme recén rematado rodado e editado en Galicia. O orzamento concedido polo ICAA foi de 570.000€.
O segundo proxecto seleccionado de Sétima é ‘A morte nos teus ollos’, en coproducción con Sideral Cinema, e dotado con 800.000€. Neste caso está dirixido por Guillermo de Oliveira, que, previsiblemente verá a luz no final do terceiro trimestre do 2025 e que se rodará na zona de Vigo, Nigrán e Porriño.
“O traballo de aprendizaxe desde Agapi nótase desde o primeiro momento no que entras a formar parte da asociación, onde atopas aopio, unión, entendemento, entras en contacto con outras empresas do sector, involucranse para axudar a sacar adiante os proxectos… O asociacionismo é, en moitos casos esencial para chegar a bo fin”, comenta Silvia Fuentes.
Frida Films é outra das empresas que obtivo unha das Axudas Selectivas. Fundada no ano 2008 en Santiago, no seu caso foron 285.000€ para o proxecto ‘Los invitados’ en coproducción coa empresa alemá TheMatch Factory e que se rodará entre Alemaña e Galicia durante o mes de maio.
O orzamento máximo, 800.000€ foi para ‘Pínkala’, segunda longa de FridaFilms, dirixida por Juanjo Guiménez, primer español en gañar unha Palma de Ouro en Cannes coa curtametraxe “Timecode”.
Luisa Romero, de Frida Filmes, e membro da directiva de Agapi desde fai 13 anos, destaca que “sinto que se trata dunha asociación que funciona, que sempre tendemos a man para axudar ás produtoras asociadas. Persoalmente creo moito no asociacionismo para sacar adiante proxectos”.
Miramemira, produtora con sede en Santiago, recibiu a Axuda Selectiva do ICAA para o proxecto ‘Querer vivir un grito’, de Diana Toucedo, en coproducción con Alba Sotorra e Amorambre (o proxecto empresarial persoal de Andrea Vázquez). Foron 800.000€ para esta longa en producción.
Mirameira tamén recibiu apoio coa coproducción ‘Petróleo’ entre España (Xavi Font – Zuzú Cinema e Andrea Vázquez – Miramemira), Francia (Julien Naveau – Le Plein de Super), Colombia (Laura Solano – Camara Lenta), e Venezuela (Merlyn González).
E co documental ‘Ana máis nós’, dirixido por María Yáñez. Trátase dunha coproducción galega entre Miramemira, Zuzú Cinema e Morambre.
“Este orzamento axudará a levar a cabo estes proxectos que serán o noso traballo nos vindeiros anos”. Con respecto a formar parte de Agapi “destaco a rede que facemos entre compañeiros, a rede informativa, a de axuda… e a comunidade de poñer en marcha estes proxectos”.
Gaitafilmes obtivo subvención das Axudas Selectivas para ‘Monstruo’, en coproducción con Mordisco Films e que xa ten axudas previas, ás que se suman os 575.00€ do ICAA. Conta coa participación da TVG e TVE. “Trátase dun proxecto moi avanzado que comezará rodaxe na primavera do 2025”, comenta Suso López que tamén destaca “un proxecto moi persoal e artístico, fantástico, do estilo de Andrés Goteira, o director”.
Matriuska, con sede en Pontevedra, recibiu 342.00€ para ‘O pesadelo das vacas’, dirixido polo galego Rafa de los Arcos, película que amosa cunha ollada de perspectiva de xénero a sociedade no ámbito rural.
Con esta axuda “prácticamente pechamos a financiación para comezar a rodar ao redor do mes de setembro de 2025. Agora mesmo estamos traballando nas localizacións que serán entre Ourense e Pontevedra”, comenta Dani Froiz, de Matriuska.
Abano, de Chelo Loureiro, tras un ano cargado de éxitos suma a obtención dunha axuda do ICAA de 171.00€ para a animación ‘Mu-Ki-Ra’, coproducción España e Colombia, e que supón a ópera prima da directora colombiana Estefanía Piñeres, tamén recoñecida actriz latinoamericana. “Un proxecto ao que cheguei a través dunha xornadas de MIA, Muller na Industria da Animación, e no que xa levamos traballando moito tempo. Na actualidade estamos en producción, con música de Nani García e que tamén conta coa colaboración de María Barro no guion conxuntamente coa mesma Estefanía. Contamos con telo rematado para finais do 2025 para a súa estrea no 2026”.
Nós Produtora Cinematográfica Galega recibiu máis de 97.555€ para ‘Prefiro condenarme’, documental dirixido por Margarita Ledo e que foi estreado o pasado mes de novembro en salas. “Estamos moi contentas con esta axuda que nos permite seguir traballando. Sobre todo tendo en conta os criterios desta liña de axudas e que, para documental, sempre son máis restrinxidas. E, vendo que todas as empresas beneficiarias galegas son membros de Agapi, demostra a importancia de asociarse e de seguir producindo en galego. As axudas para empresas galegas fainos máis visibles e demostra facemos moi bo cine, da man de boas produtoras, o que nos consolida no panorama internacional”, comenta Olaia Ledo, de Nós Produtora.