O talento galego triunfa en Francia: tres filmes de produtoras asociadas a AGAPI participan no 37º FID Marsella
O prestixioso Festival Internacional de Cine de Marsella celebra a súa 37ª edición do 7 ao 12 de xullo, consolidándose como unha cita imprescindible no calendario cinematográfico europeo. Nesta ocasión, o audiovisual galego terá un protagonismo especial grazas á participación de tres títulos producidos por empresas asociadas de AGAPI. O que reafirma o excelente estado de saúde e a proxección internacional do noso cinema.
O fito máis destacado do certame será a estrea mundial de ‘Todo é cárcere’, a nova longametraxe do cineasta Eloy Enciso, producida por Filmika Galaika, que formará parte da Sección Competitiva Internacional. O filme explora cun estilo rigoroso e poético as dinámicas do illamento, o control social e a memoria histórica, mergullándose nas texturas do encerro a través de textos e testemuños que constrúen unha alegoría sobre o poder e a resistencia humana que dialoga co presente.
A mesma produtora fará dobrete no festival coa estrea francesa de ‘Krakatoa’, dirixida por Carlos Casas, que se proxectará dentro da sección Outras Xoias. Esta obra propón unha viaxe sensorial e hipnótica ao redor dun dos volcáns máis famosos e destrutivos do planeta a través dun ensaio audiovisual e sonoro que explora o seu impacto no imaxinario colectivo, a xeoloxía e o mito, difuminando as fronteiras entre o documental de natureza e a arte contemporánea.
Finalmente, as produtoras asociadas Maruxiña Film Company e Matriuska Producións viaxan a Marsella con ‘Así chegou a noite’, dirixida por Ángel Santos. A cinta terá a súa estrea en Francia dentro da Sección Competitiva GNCR, un apartado independente de vangarda e risco, para presentar unha crónica do solpor de ton íntimo e pausado onde os personaxes se enfrontan á perda, ao paso do tempo e á mutación das paisaxes que habitan.
