O Festival de Cans recoñeceu o traballo das asociadas de AGAPI con sete cans de pedra na sección oficial a concurso e o Premio de Honra Pedigree a Jaione Camborda
O Festival de Cans vén de facer público o seu palmarés desta 23º edición, no que o talento das asociadas de AGAPI foi amplamente recoñecido. O filme ‘Cara de cona‘, dirixido por Guillermo de Oliveira e producido por Sétima fíxose co Premio do Público de Cans así como co Premio á Mellor Interpretación Masculina para Nancho Novo. “Por conseguir en pouco tempo unha interpretación magnética e ser capaz de soster un primeiro plano dun xeito arrebatador, dando como resultado un momento cinematográfico memorable dos que permanecen no recordo do espectador”.
O premio á Mellor Dirección foi para Paula Pereira por Algo novo que contar, unha obra producida por Brava e recoñecida “por observar con empatía a dúas personaxes nun proceso vital transcendental cunha mirada delicada e sutil que fai que queiras entrar no seu mundo”. A obra tamén gañou na categoría interpretativa feminina, para Grial Montes e Lidia Veiga, actrices protagonistas. O xurado destacou “o enriquecemento mutuo e o equilibrio a través dun traballo actoral de escoita, sostendo de forma maxistral os silencios, e dando como froito unha interpretación contida, concreta e sensible”.
No apartado de Animación, o premio principal foi para O corpo de Cristo (Abano Producións), de Bea Lema , recoñecido “por contar dun xeito audaz unha historia sobre saúde mental, un tema que nos afecta a todas, e facelo dun modo tecnicamente innovador, acorde ao relato”. O xurado destacou ademais a capacidade da directora para “tecer dun xeito delicado varias cuestións que lle plantea ao espectador cunha execución maxistral”. A obra sumou tamén o premio á Mellor Banda Sonora para Paloma Peñarrubia, valorada “por estar perfectamente integrada na peza e facer crecer narrativamente a historia, e pola súa sutileza, sen subliñar emocións á vez que as acompaña”.
Na sección Furacáns (Non Ficción), o premio principal foi para Escala un cincuenta mil, de Ángel Suances e producida por Rebordelos, recoñecido “pola súa sutil e atmosférica construción da memoria a través do movemento, os fragmentos e unha deriva emocional”. O xurado da sección concedeu ademais unha mención especial para a produción de Sétima a Furada Negra, dirixida Berio Molina, “por converter o son nunha forma de escavación que revela ecos, lendas e violencias enterradas que habitan a paisaxe subterránea”.
O Festival de Cans entregou ademais o Premio Pedigree de Honor a Jaione Camborda (Esnatu Zinema). Querendo recoñecer así a traxectoria dunha cineasta xa imprescindible no audiovisual galego. Nos seus filmes, como O Corno e anteriormente Arima, Camborda constrúe relatos profundamente enraizados no territorio, cunha mirada que sitúa ás mulleres no centro da historia e que explora os límites do ser humano.