A serie televisiva ‘Hierro’ e as películas ‘Quien a hierro mata’ e ‘O que arde’ acaparan un gran número de nomeamentos aos XVIII Premios Mestre Mateo, segundo revelou onte a Academia Galega do Audiovisual nun acto celebrado onte na Coruña.

Unha das novidades desta edición é que unha produción de televisión é a que conta cun maior número de candidaturas, a serie ‘Hierro’, producida por Portocabo, que suma un total de dezaseis. Emitida en Movistar+, ‘Hierro’ narra a historia de Candela (Candela Peña), xuíza experta e de forte carácter. Recentemente chegada ao seu novo destino, a illa canaria do Hierro, tócalle enfrontarse a un caso de asasinato.

Seguenlle de preto a ‘Hierro’ as longametraxes ‘Quien a hierro mata’, do director Paco Praza e producida por Vaca Films, con quince candidaturas, e ‘O que arde’, producida por Miramemira e dirixida por Óliver Laxe, con doce. As tres competirán polas estatuiñas que premian a Mellor Dirección, Guión, Fotografía, intérpretes protagonistas, Maquillaxe e perruquería, Montaxe, Son, Dirección de Arte e Dirección de Produción e Vestiario.

Segundo trasladou a organización no acto conducido pola actriz Tamara Canosa e o comunicador Rodrigo Vázquez onte ao mediodía no Teatro Colón da Coruña, a primeira rolda de votacións sitúa esta edición como unha das máis igualadas dos últimos anos. A unha certa distancia das tres favoritas sitúanse a película ‘Eroski Paraíso’, producida por OlloVivo e a serie ‘A estiba’. A adaptación para cinema do éxito teatral da compañía Chévere consegue sete candidaturas, mentres que o thriller policial da TVG obtivo seis.

Dos 18 documentais candidatos, os catro que chegaron a finalistas versan sobre temas moi diversos, como a ciencia, con ‘O futuro da mente’, de Agallas Films e Somadrome, o documental biográfico, representado por Manoliño Nguema de Filmika Galaika; a loita social, con ‘Noite irisada’ de Taller de Insomnios e Recunchos de Anma; así como a historia ‘O reino suevo de Galicia’, producido por La Región.

As gañadoras daranse a coñecer na gala que se celebrará o sábado 7 de marzo no Palacio da Ópera da Coruña, presentada pola actriz galega Patricia Vázquez.