Miramemira, produtora de ‘Sica’ e Matriuska Producións, produtora de ‘Matria’ vivirán nuns días un acontecemento único. Por primeira vez dous títulos de produtoras galegas e en galego chegan no mesmo ano a estrear nun dos Festivais máis importantes do mundo, a Berlinale. Todo un orgullo para a produción independente.
O Festival Internacional de Cine de Berlín celebra este ano a súa edición número 73. Terá lugar na cidade alemá entre os días 16 e 26 deste mesmo mes de febreiro.
‘Sica’, ópera prima de Carla Subirana e producido pola empresa asociada a Agapi, Miramemira, xunto con Alba Sotorra, Zuzú Cinema e Amorambre Films, terá a súa estrea na sección Generation. ‘Sica’ explora o papel das mulleres nunha sociedade marcada pola ausencia e polos compases dun océano asolagado ao mesmo tempo de vida e de morte.
‘Matria’, ópera prima de Álvaro Gago producida pola empresa socia de Agapi, Matriuska Producciones, xunto con Avalon P.C, Elastica Films e Ringo Media, estrearase na sección Panorama. Alí proxectarase a historia de Francisca Iglesias, a muller que coidou ao seu avó e cuxa historia transcende o xeográfico, as Rías Baixas, para instalarse na universalidade e desafía a individualidade para abrir unha singradura colectiva, unha contestación ao relato asentado e irreal dun suposto matriarcado galego.