Curtocircuíto celebra a súa 23º coa presenza de produtoras asociadas de AGAPI ao longo de toda a súa programación
O Festival Internacional de Cinema Curtocircuíto celebra a súa 23ª edición en Santiago de Compostela, do 30 de xuño ao 5 de xullo, cunha fortísima presenza do talento galego. Con producións das nosas asociadas de AGAPI conformando gran parte dunha programación de vangarda que pon en valor a calidade e a proxección do cine feito en Galicia.
A inauguración do certame correu a cargo de Despois das cidades (Rebordelos), a última peza do cineasta Xacio Baño. O interese por este filme esténdese ata o mércores 1 de xullo, día no que o director manterá unha conversa aberta co filósofo e escritor Antón Baamonde e a historiadora Encarna Otero para afondar nos eixes temáticos da obra. O festival tamén contará con outras proxeccións especiais de gran calado, como o pase o vindeiro venres 3 de xullo de Krakatoa (Filmika Galaika), a nova viaxe sonora e visual de Carlos Casas, ou a clausura oficial o domingo 5 de xullo coa agardada ópera prima de Adrián Canoura, Fomos ficando sós (Zeitun Films).
Pola súa banda, a sección Planeta GZ, un dos grandes piares de Curtocircuíto e termómetro do cine galego máis contemporáneo, conta este ano con cinco obras con selo de AGAPI. Entre os títulos seleccionados atópanse O corpo de Cristo (Abano Producións) de Bea Lama, As maos da pulpeira (Matriuska Producións) de Silvia Cachafeiro, Escala un cincuenta mil (Rebordelos) de Ángel Suanzes, así como Cara de cona e A pena, ambas as dúas producidas por Sétima e dirixidas por Guillermo de Oliveira e Iria Silvosa respectivamente.
