| O filme ‘San Simón’, primeira película do director manchego Miguel A. Delgado, abriu este mércores as súas portas a unha xornada de rodaxe na illa redondelá, escenario onde se recrea o seu pasado como campo de concentración durante a Guerra Civil Española. A produtora executiva, Andrea Vázquez, destacou que ”San Simón é un filme de ficción aínda que con tintes documentais que se basea en feitos reais. Houbo un casting de máis de 3.000 persoas para seleccionar unhas 250, entre protagonistas e figurantes”. O reparto conta con profesionais consolidados como Valentín Estévez, Javier Varela, Miguel Borines e Tatán, amáis de familiares de persoas que pasaron pola illa durante a súa época como campo de concentración, como Manuel Carbia, neto de Celestino Carbia, republicano de Valga preso en San Simón e fusilado en Pontevedra en maio de 1937. |
 O arquivo Nomes e voces do grupo de investigación Histagra da Facultade de Historia da USC, xunto á colaboración do catedrático Lourenzo Fernández Prieto, foi unha peza importante para a elaboración do guión. “Buscamos e apoiamos proxectos que conteñan historias que deben ser contadas e compartidas co público”, afirmou Andrea Vázquez, directora da produtora audiovisual Miramemira. Despois de varios anos de investigación e recompilación de información, co filme ‘San Simón’ naceu un novo proxecto que utilizará todo o material xerado para seguir explicando esta historia máis detalladamente a través dun webdoc que conta co apoio na produción da Televisión de Galicia. ‘San Simón’ retrata a colonia penitenciaria que foi a illa entre 1936 e 1943, baseándose en historias reais. A rodaxe comezou este mes no arquipélago e continuará nas próximas semanas no complexo militar da ETEA (Vigo), o convento de Santa Clara (Pontevedra) e a Cova da Moura (Ourense). A data da estrea da película está prevista para finais do 2024 ou inicio do 2025. “San Simón” é unha produción de Miramemira, Morelli Producciones e Bando á Parte (Portugal), co apoio do ICAA, Axencia Galega das Industrias Culturais, TVG, TVE, TV Castilla-La Mancha e Abycine, e a colaboración de O Faiado da Memoria, o Obradoiro de Estudos Locais Fernando Monroy e o asesoramento do grupo Histagra (Historia Agraria e Política do Mundo Rural. Séculos XIX e XX).  Antonio Caeiro, Manuel Carbia, Iván Crespo, Rita Pérez, Digna Rivas, Pedro Blanco, Andrea Vázquez, Miguel A. Delgado, Anxo Lorenzo, María Sabucedo, Jacobo Sutil, Marta Lucio e Lourenzo Fernández Prieto. Foto de Manuel G. Vicente O acto que se celebrou na illa de San Simón contou coa presenza de Pedro Blanco, delegado do Goberno en Galicia; Anxo Lorenzo, director xeral de Cultura da Xunta de Galicia; Jacobo Sutil, director da Axencia Galega das Industrias Culturais; Marta Lucio, directora do Museo do Mar; María Sabucedo, directora da plataforma A Galega; Digna Rivas, alcaldesa do Concello de Redondela; ediles do concello de Redondela; Antonio Caeiro, de O Faiado da Memoria e director do documental Aillados; Lourenzo Fernández Prieto, catedrático de Historia Contemporánea da Universidade de Santiago de Compostela e director de Histagra; e Manuel Carbia, neto de Celestino Carbia. |
