Chega a 19ª edición do FICBUEU con varios títulos de asociadas de AGAPI dentro da súa programación
O Festival Internacional de Cinema de Bueu (FICBUEU) presentará a súa 19ª con filmes de máis case unha trintena de países nunha programación que se abrirá na xornada de inauguración o venres 4 de setembro.
A Sección Oficial reunirá 28 curtametraxes distribuídas en seis programas, que se proxectarán entre o luns 7 e o sábado 12 de setembro. A selección atravesa temas e formas moi diversas: os conflitos familiares e os coidados, a guerra e o desprazamento, a identidade, a memoria, a vellez, a precariedade, as expectativas económicas ou a procura dun lugar propio. Faino ademais desde ficcións, documentais e propostas de animación que amosan a diversidade formal e narrativa do formato curto contemporáneo. Nesta selección atópanse as obras galegas:
- Escala un cincuenta mil (Ángel Suanzes) producida pola asociada de AGAPI Rebordelos e ambientada en xullo de 1974 e centrada nunha muller cuxa transformación persoal transcorre en paralelo aos cambios políticos que se achegan en España.
- El cuerpo de Cristo (Bea Lema) un relato bordado en animación que se aproxima ao sufrimento psíquico desde «o brando e o belo» producido pola asociada de AGAPI Abano Producións.
Por outra banda, a competición GZ_00 reafírmase un ano máis como unha das grandes fiestras para descubrir o cinema galego contemporáneo. Cinco propostas que comparten unha mirada profundamente persoal sobre o mundo: a memoria íntima dun reencontro inesperado, a exploración do territorio e da lembranza, a reapropiación dunha lenda urbana viguesa desde a cultura pop, unha viaxe sensorial a través dos sons da cidade ou a delicadeza dos encontros marcados polo tempo e pola paisaxe. Forma parte desta competición Furada Negra, de Berio Molina, producida pola asociada de AGAPI Sétima. Un percorrido táctil e sonoro pola memoria rochosa universal.
