A mostra de cinema Vendaval fala de memoria e territorio na Ribeira Sacra a través dos filmes ‘Anoche conquisté Tebas’ e ‘As Estações’ (Filmika Galaika) ou ‘San Simón’ (Miramemira)
O Vendaval, Mostra de Cinema Portugués na Ribeira Sacra, celebra a súa terceira edición do 25 ao 30 de agosto con seis días de programación en diferentes espazos da comarca. Proxeccións, encontros con cineastas, coloquios, formación, concertos e sesións DJ conforman unha proposta que mantén a vontade da mostra de levar o cinema a novos espazos, favorecer o encontro e achegar a cultura ao territorio. Todas as actividades son de balde. O tema desta terceira edición, Historia e territorio, propón unha reflexión sobre as múltiples capas de historia que atravesan os lugares que habitamos. A través de filmes moi diversos, o programa achégase a territorios nos que o pasado dialoga co presente, xa sexa como memoria, como conflito ou como pegada aínda activa.
Dous destos filmes, onde o territorio como arquivo está realmente presente, son ‘Anoche conquisté Tebas’ e ‘As Estações’, da produtora asociada de AGAPI, Filmika Galaika. A película de Grabiel Azorín chegará á Abadía da Cova o xoves 27 de agosto, nunha sesión que contará coa presentación de Teresa Castro, de Calcutá, e unha conversa sobre a súa banda sonora, ademais dun concerto previo de Calcutá arredor da música do filme. O filme de Fazendeiro poderá verse o sábado 29 de agosto no ACM de Bóveda, coa presenza de Melánia Freire.
A memoria histórica e o colonialismo é o tema central do filme ‘San Simón’ de Miguel Ángel Delgado, producida pola asociada de AGAPI Miramemira. Que se proxectará o domingo 30 de agosto na Casa da Memoria, de Bóveda, coa presenza do propio realizador. Delgado participará ademais o venres 28 nunha conversa con Xurxo Ayán e, posteriormente, nun encontro sobre memoria histórica xunto a Margarida Cardoso e Sérgio Coragem.