A produtora independente Miramemira acaba de dar un paso adiante grazas ao enorme éxito da nova película de Oliver Laxe O que arde, que non só conseguiu o recoñecemento da crítica senón tamén o do público, converténdose xa na película en galego máis vista da historia.
Pero o traballo desta produtora comezou moito antes, concretamente no 2006, ano no que Andrea Vázquez e Damián Varela deciden combinar os seus estudos de cinema e historia da arte para fundar a produtora Miramemira. O proxecto nace cunha liña editorial moi clara: audiovisuais para museos, pezas de carácter expositivo e tamén produción de vídeo para artes escénicas, en especial teatro e danza contemporánea. Traballaron e traballan para o CGAC, Fundación Cidade da Cultura, Centro Dramático Galego… Ademais levan xa varios anos traballando para a compañía de teatro Voadora e a compañía de danza contemporánea Pisando Ovos da coreógrafa e bailarina Rut Balbis.
Agora mesmo atópanse nun punto de inflexión importante xa que a produción da súa primeira longametraxe, O que arde, abriulles unha porta a outra liña de traballo que non se plantexaban: a ficción. E é que en palabras de Andrea Vázquez “con O que arde houbo un crack”. Na actualidade atópanse xa traballando noutro proxecto de ficción, San Simón, unha longametraxe que se achegará a ese período histórico pouco coñecido da illa de San Simón, os sete anos nos que foi un campo de concentración durante a ditadura de Franco.
Para este proxecto uniron forzas con Morelli Producións, a produtora madrileña que está detrás de documentais como La Línea de la sombra sobre a vida e obra do fotógrafo Alberto García- Alix.
En Miramemira teñen claro que queren seguir traballando nos dous camiños, tanto o cinema como o plano máis académico e artístico, xa que “ambos poden beber o un do outro”.
Falamos con Andrea Vázquez sobre o audiovisual galego e aínda que afirma que realmente leva só desde o 2016 dentro do mundo da ficción, cre que “creativamente estamos nun momento súper bo, e proba diso son títulos como O que arde, Longa Noite, Arima …ademais estamos a recibir moito recoñecemento en festivais de prestixio. Creo que institucións como Agadic e TVG están a darse conta do potencial do sector, así que esperamos que sigan apoiándoo con máis axudas”.
Como toda produtora independente o reto “é seguir sendo quen son e conseguir o financiamento para sacar adiante as producións, sen perder autenticidade e o carácter máis autoral e arriscado”.
*Foto: Tamara de la Fuente