A inauguración da Exposición Fotográfica dos prestixiosos Premios LUX, ademais de con representantes da Escola de Imaxe e Son, contou en directo, con conexión desde Barcelona, coa participación de Eva Casado e José Ornia, Presidenta e Vicepresidente da Asociación de Fotógrafos Profesionais de España ( AFP) entidade organizadora deste evento referente da fotografía profesional en España.
No ano 1992, a Asociación de Fotógrafos Profesionais, decidiu crear os primeiros premios de fotografía profesional de ámbito estatal para recoñecer e promocionar aos mellores fotógrafos profesionais especializados en Publicidade, Arquitectura, Bodegón, Industrial, Moda e Retrato. Nacían os Premios LUX. Durante estas 26 edicións, os Premios LUX mostraron a evolución da fotografía de encarga que viu marcado o seu camiño pola creatividade e a capacidade de innovación dos fotógrafos, nun período de profundos cambios sociais e tecnolóxicos.
A Escola de Imaxe e Son de Vigo ( EISV) presentou nesta nova ocasión a mostra formada polas obras gañadoras dun LUX Ouro, Prata e Bronce nas dez categorías profesionais así como o Premio Junior da edición 2018 dos Premios LUX.
A Exposición terá lugar ata o 15 de marzo de 2020 en horario de 12:00 a 14:00 e de 16:00 a 20:00 hrs. na SALA EXPO da EISV na primeira planta, aberta a todos os públicos previa acreditación na recepción do Centro por Normativa Legal Educativa.