Un total de 16 premios Mestre Mateo foron para empresas asociadas a Agapi, incluído o de Mellor Película para a longametraxe “Ons” da produtora Maruxiña Films e Mellor dirección para Paula Cons de Agallas Films polo filme “A illa das mentiras”.
O equipo de “Ons” gañou 9 dos 13 premios aos que estaban nomeados, a película da produtora Maruxiña Films fíxose cos premios a Mellor Longametraxe, Mellor Dirección de fotografía para Alberte Branco, Mellor Dirección de produción para Tamara Soto, Mellor guión para Alfonso Zarauza e Jaione Camborda, Mellor interpretación feminina protagonista e de reparto para
Melania Cruz e Marta lado respectivamente, Mellor Interpretación masculina protagonista para Antonio Durán “Morris”, Mellor Montaxe para Fernando Alfonsín e Mellor Son para Sergio Silva e David Machado.
En palabras de Alfonso Zarauza “Estamos moi felices co resultado, estes 9 premios son unrecoñecemento a un traballo feito con moitísimo amor, esforzo e tamén moito sufrimento. É un recoñecemento a case todos os aspectos técnicos da película, desde a fotografía, o son, montaxe e ao guión, pero tamén aos actores, ao final é un recoñecemento global á calidade da película, un proxecto feito con moitísima paixón. Estamos moi agradecidos aos académicos e tamén ao público que foi a vela”.
A outra gran vencedora da noite foi “A illa das mentiras” da produtora de Agallas Films, que levou 4 galardóns, incluído o de Mellor Dirección para Paula Cons, Mellor Dirección de Arte para Antonio Pereira, Mellor Interpretación Masculina de reparto para Milo Taboada, Mellor Maquillaxe e peiteado para Raquel Fidalgo e Patricia Vilela e Mellor Vestiario para Eva Camiño.
Falamos con Paula Cons sobre como recibiron este recoñecemento: “estamos moi contentos, é un broche precioso a un percorrido que empezou moi lonxe, no un festival de Clase A como é o Festival de Shanghái. Persoalmente para min este premio á Mellor Dirección é para todo o equipo e desde logo non tería sido posible sen o traballo das finalistas Vitoria Teijeiro e Nerea Barros. Estamos súper agradecidos a todas as institucións que apoiaron o proxecto, desde Agadic, TVG, TVE, Etb e o Goberno Vasco, ICAA, Ibermedia, Portugal e Arxentina”.
Ademais, o premio ao Mellor Documental foi para “Nación” dirixido por Margarita Ledo da produtora Nós, Produtora Cinematográfica Galega. E tamén a animación foi recoñecida co premio á Mellor Curtametraxe de Animación para “Carne” de Abano Producións.
A pesar das dificultades, a gala dos Premios Mestre Mateo puido celebrarse no Teatro Colón da Coruña baixo unhas estritas medidas de seguridade, unha oportunidade de reencontrarse de novo cos compañeiros e socios, despois dun ano de contacto só a través das pantallas. A recompensa deste premios é permitir devolver as películas ás salas, en concreto “Ons” poderase ver de momento en Vigo, A Coruña e Santiago, “A illa das Mentiras” terá percorrido no verán nos cinemas ao aire libre e “Nación” aínda segue presente en carteleira en varias cidades e vilas. Ademáis, varios dos proxectos premiados están dispoñibles na plataforma Filmin.