Zeitun Films

Zeitun Films

Zeitun Films



Dirección: Rúa Puerta de Aires 12, 2º
15001 A Coruña (A Coruña}
Contacto:
Teléfono:
E-mail: info@zeitunfilms.com
Web: www.zeitunfilms.com

PROXECTOS:

Miguel’s war (2021)
Lúa Vermella (2020)
Mimosas (2015)
A ausencia (2014)
Pozoamargo (2014)
Costa da morte (2013)
O quinto evanxeo de Gaspar Hauser (2013)
Arraianos (2012)



CURRICULUM:

Zeitun Films nace en 2009 en paralelo á produción da película ‘Todos vós sodes capitáns’,un proxecto do director Oliver Laxe creado, en certo xeito, á marxe da industria convencional, cun modelo de produción artesanal e afastado de grandes axudas financeiras de produción.

Zeitun Films é unha produtora cinematográfica galega cun marcado compromiso artístico e cultural. Todas as nosas producións até a data foron estreadas en festivais de primeiro nivel mundial (Cannes, Locarno, Rotterdam), e foron proxectadas por todos os recunchos do planeta, representando o cinema galego co máximo recoñecemento crítico.

Zeitun Films é unha marca recoñecida internacionalmente. Un caso único nos últimos anos na produción española. As nosas producións son esperadas nos foros internacionais máis importantes, como Cannes, Venecia, Berlín ou Locarno. ‘Todos vós sodes capitáns’ foi estreada no Festival de Cannes de 2010, na Quincena de Realizadores, e gañou o premio da Crítica Internacional FIPRESCl. Foi presentada en máis de cincuenta festivais internacionais e recibiu numerosos premios. A crítica internacional abrazou entusiasmada a aparición de Oliver Laxe coma gran autor no panorama cinematográfico. O filme tivo distribución comercial nos Estados Unidos e en España (2011), foi exhibido en televisión (TCM autor, TVG) e saíu ao mercado en DVD nunha coidada edición con abundante material extra.

No verán de 2010 entramos na coprodución de ‘Arraianos’, de Eloy Enciso, estreada no Festival de Locarno en 2012. O filme foi presentado nos festivais de Viena (Viennale), Hamburgo, Vancouver, DocsLisboa, Sevilla (Premio Nuevas Olas), FICUNAM de México (Mención especial) ou BAFICI de Bos Aires (Premio Vanguardia y Género) entre outros. ‘Arraianos’ chegou ás salas comerciais españolas en setembro de 2013 con distribución a cargo de CineBinario, que tamén se encargou do lanzamento en DVD.

‘O Quinto Evanxeo de Gaspar Hauser’ de Alberto Gracia, a nosa terceira longametraxe, foi estreada no Festival de Róterdam de 2013, onde gañou o Premio da Crítica Internacional.

O cuarto filme producido por Zeitun Films, ‘Costa da Morte’, comezou a súa carreira internacional da mellor maneira imaxinable ao recibir o premio ao Mellor director emerxente no Festival de Locarno en 2013. Desde entón, o documental participou en setenta festivais internacionais recibindo multitude de premios (premio Nuevas Olas No-ficción no Festival de Sevilla, premio do Público en Dei Popoli, mellor película en Jeonju Corea do Sur, mellor película en FICUNAM México, mellor película en Play-Doc Tui, …). A finais de setembro de 2014 Costa da Morte foi estreada en salas comerciais de varias cidades de España e no ano 2015 foi distribuída comercialmente nos Estados Unidos. Así mesmo, na primavera de 2014, o filme foi exhibido a diario e durante dous meses dentro da programación regular da Cineteca Nacional de México, sendo vista por máis de catro mil espectadores.

‘Pozoamargo’ (2015) de Enrique Rivero foi a quinta produción de Zeitun Films, e realizouse en coprodución entre México e España. Foi estreada no Festival de Sevilla 2015, onde gañou o premio Nuevas Olas. Tralo seu percorrido por festivais internacionais, entre o que se incluíu FICUNAM, onde recibiu a Mención especial, foi estreada comercialmente en España e México.

‘Mimosas’ de Oliver Laxe, coprodución entre España, Marrocos e Francia, foi a nosa sexta longametraxe e estreouse no Festival de Cannes de 2016, onde se alzou co Gran Premio da Semana da Crítica. Posteriormente percorreu un extenso circuíto de festivais internacionais no que recibiu múltiples galardóns, como o Premio especial do xurado e a Mención especial ó mellor son e montaxe do Festival de Sevilla, a Pirámide de Ouro á mellor película e o premio ó mellor actor principal no Festival Internacional de Cine do Cairo (Exipto), ou a mención especial da sección ‘Vanguardia y Género’ do BAFICI (Arxentina). Ademais, ‘Mimosas’ foi recoñecida cos Premios Mestre Mateo ó mellor director e á mellor dirección de produción. A nivel comercial, o percorrido de ‘Mimosas’ resultou tamén enormemente destacable, sendo estreada comercialmente en países como España, Francia, Reino ou EUA, entre outros.

A nosa sétima produción, a curtametraxe ‘Tshweesh’, foi dirixida pola directora libanesa Feyrouz Serhal e estreouse no Festival de Locarno en 2017. Actualmente continúa o seu percorrido por festivais internacionais tras ter sido exhibida nos de Busan, Torino, Clermont-Ferrand, Beirut (Premio á mellor curtametraxe), Short Waves (Mención especial), Beijing (Mirage award) ou FIDBA de Buenos Aires (Premio á mellor curtametraxe internacional), entre outros.

‘La Estrella Errante’, dirixida por Alberto Gracia, foi estreada na edición de 2018 do Festival de Rottedam e a súa traxectoria por festivais inclúe o FICCI-Festival Internacional de Cine de Cartagena de Indias, o Festival de Sevilla, onde gañou o premio Nuevas Olas, ou o Dock of the Bay Festival de San Sebastián, onde gañou o premio ó mellor documental musical.

‘Lúa Vermella’ de Lois Patiño estreouse na edición de 2020 da Berlinale, dentro da sección Forum, e o seu percorrido en festivais continúa a día de hoxe tras ser exhibida en FICUNAM, o Festival de Jeonju en Corea do Sur ou o festival New Directors/New Films de Nova York, entre outros.

En 2021 ‘Miguel’s War’ de Eliane Raheb, a nosa última longametraxe, foi tamén estreada na Berlinane, nesta ocasión na sección Panorama, alzándose co premio Teddy á mellor longametraxe e ficando na segunda posición do premio do público. ‘Miguel’s War’ continúa actualmente a ser exhibida nos principais festivais cinematográficos.

Recentemente Zeitun Films produciu dúas curtametraxes: ‘Rompente’ de Eloy Domínguez Serén, cuxa estrea está prevista para 2022, e ‘Sen Ti’ de Feyrouz Serhal, rodada no verán de 2021 e que se atopa en fase de posprodución. Ademais, Zeitun Films está inmersa actualmente no desenvolvemento de ‘I am here but you can’t see me’, primeira longametraxe de Feyrouz Serhal, e de ‘Montaña ou Morte’ de Pela del Álamo.

‘Tralovento’ será unha nova colaboración entre Zeitun Films e Eloy Domínguez Serén, nesta ocasión nunha longametraxe de ficción.

Desde os seus inicios Zeitun Films demostrou ser unha produtora preparada para os tempos actuais, uns tempos duros que obrigan a orzamentos contidos e a apostar pola coprodución e colaboración internacional. Son tamén tempos nos que é máis necesario ca nunca defender o talento dos nosos creadores que proxectan a nosa cultura no mundo.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies